Dwòje nowëch Stolemów

22 stëcznika kapituła Medalu (nôleżnicë Klubù Sztudérów "Pomorania") wëbrała nowëch stolemòwców. Òstelë nima: Justina Pòmierskô i Daniél Kalinowsczi. Winszëjemë laùreatóm!

Justina Pòmierskô to didaktik pòlsczégò i kaszëbsczégò jãzëka, adiunkt w Zakładze Stosowóny Pòlonisticzi Gduńsczégò Ùniwersytetu, òd 2015 je nôleżniczką Zarządu Kaszëbsczégò Institutu, robi w redakcje cządnika „Acta Cassubiana”. Òd 2011 r. czerowniczka pòdiplomòwëch sztudiów Naùczanié kaszëbsczégò jãzëka, wespółùtwórczka czerënkù kaszëbskô etnofilologiô, przédniczka Programòwi radzëznë tegò czerënkù.

Na spòdlim doktorsczi disertacje napisóny pòd czer. Jerzégò Sampa pòwstała ji ksążka Przysłowia kaszubskie. Studium z paremiografii i paremiologii i Przësłowie samò sã rodzy w głowie. Kaszubskie przysłowia z polskimi odpowiednikami.

We wespółaùtorstwie wëdała dwie mònografie w dwajãzëkòwi wëdôwny serie Kaszëbsczégò Institutu i Kaszëbskò-Pòmòrsczégò Zrzeszeniô Vademecum: Język kaszubski/ Jãzëk kaszëbsczi (z J. Trédrã i D. Pażdżersczim, 2015) i Kaszubi w III RP/ Kaszëbi w III RP (z Ł. Grzãdzëcczim i C. Òbracht-Prondzyńsczim, 2019). Bëła nôleżniczką interdiscyplinarnégò badérnégò karna Kaszëbsczégò Institutu, jaczi przërëchtowôł i wëdôł encyklopediã wiédzë ò Kaszëbach pt. Gniazdo gryfa. Słownik kaszubskich symboli, pamięci i tradycji kultury.

Daniél Kalinowsczi òd 1996 r. robi na pòlonistice Pòmòrsczégò Ùniwersytetu (czedës Akademie) w Słëpskù. Doktorizowôł sã w òbrëmim pòlsczi lëteracczi afòristiczi XIX wiekù. Habilitacjã ùdostôł na spòdlim dokazu ò pòlsczi recepcje ùtwórstwa Franza Kafczi.

W Pòmòrsczi Akademie trzimôł fùnkcje: czerownika Zakładu Antropòlogie Lëteraturë i Kaszëbskò-Pòmòrsczich Badérowaniów w Instituce Pòlonisticzi, prodzekana Filologiczno-Historicznégò Wëdzélu, czerownika Sztudiów Trzecy Rówiznë, dzekana Filologiczno-Historicznégò Wëdzélu Pòmòrsczi Akademie i dzysdnia direktora Doktorsczi Szkòłë.

Témiznowi redaktór nôùkòwégò cządników „Acta Cassubiana”, „Nasze Pomorze”, przédny redaktór „Biuletinu Radzëznë Kaszëbsczégò Jãzëka”. Nôleżnik Zarządu Kaszëbsczégò Institutu. Je aùtorã wiele pùblikacjów zrzeszonëch z kaszëbską lëteraturą, m.jin.: Raptularz kaszubski; Sylwa kaszubskie; Pasaże kaszubskie; Teatr kaszubski. Fenomen. Formy. Środowisko a téż we wespółaùtorstwie z Adelą Kùjik-Kalinowską: Od Smętka do Stolema. Wokół literatury Kaszub; Literatura kaszubska. Rekonesans.

Zainteresowónëch òdsélómë na starnã www.kaszubopedia.pl, dze nalézeta jich dłëgszé biogramë:

https://kaszubopedia.pl/index.php/tworcy-kaszubopedii/justyna-pomierska/?lang=kk

https://kaszubopedia.pl/index.php/tworcy-kaszubopedii/daniel-kalinowski/?lang=kk