Reklama

Dzëczi w òdwroce

Klëka

25/10/2025 19:26

Aùtór: Jerzy Strzelecki; zdrzódło: https://pl.wikipedia.org/wiki/Dzik_euroazjatycki#/media/Plik:Locha(js).jpg

Afrikańsczé pòszëdło swiniów i dzejania dlô strzimaniô jegò rozwiju dałë to, że w Trzëgardze je widzec wiele mni dzëków, jak jesz rok nazôd. Terô nôczãscy jidze pòtkac na szasëjach lësë.

Mieskô Starżô w Gdinie pòcwierdzëła to, co merkają w slédnym czau mieszkańcë – w gardze to dô corôz mni dzëków. Òdjimczi i nagrania tëch zwierzãt chòdzącëch nié leno na zberkù gardu, le téż w dëcht zabùdowónëch dzélach, jesz łoni krążëłë pò Internece i rozsławiłë Gdiniã na całi krôj, a dzysdnia jich ju ni ma widzec. Starżô tedë dostôwała pò czilenôsce zgłoszeniów ò bëtnoscë dzëków na dzéń, a terô colemało niżódnégò. W slédnym czasu jednégò le młodégò dzëka widzelë w centrum, ale starżë nie ùdało sã gò drëdżi rôz trafic. Je wiedzec leno ò dwùch wiôldżich karnach dzëków, jaczé żëją na Pògórzim i Òksëwim. Do zmniészeniô jich pòpùlacje przeczëniło sã afrikańsczé pòszëdło swiniów i pòdjimóné métle biôtczi z rozkòscérzanim sã wirusa. Terô dzëwé zwierzãta, jaczich w Gdinie je nôwicy, to lësë, a starżnicë taksëją że je jich co nômni tëli, co kòtów. W jich przëtrôfkù nôwikszą zagrôżbą je chòrosc pòtencjalnô groznô téż dlô samëch lëdzy – szôl. Na szczescé ni ma wiadłów ò jegò wëstãpòwanim ù lësów na Kaszëbach w òstatnym czasu – czile dni nazôd béł le wëkrëti jeden przëtrôfk patogenu szôlu ù zdechłégò szãtopierza w Parchòwie, ale wedle weterinarzów ni mòże gadac ò wrócenim pòszëdła na Pòmòrzé. Spôdk lëczbë dzëków a rost lësów jidze téż zmerkac w pòdlesnëch dzélach Sopòtu i Gduńska.

H.S.Sz.