Reklama

Dzecë ùretałë mëmkã przed òjcã w gminie Bëtowò

Klëka

26/09/2025 11:09

Chcôł zabic białkã i wjachac z nią aùtołã w drzewò. Sóm zgłosył sã na kòmendã i do wszëtczégò sã przëznôł.

W gminie Bëtowò w weekend doszło do atakù na jednã białkã ze starnë ji piãcdzesątlatnégò chłopa, z jaczim je w rozdënkòwim procesu. Czej wrócëła aùtołã z robòtë i pòdjachała pòd swòjã chëcz, ji chłop wrëgnął do wòzu i zaczął òwijac ji szëjã i gãbã tasmą, żebë jã zadëszëc. Krzikanié białczi ùczëłë dzecë pôrë, jaczé wëbiegłë z chëczë. Spłoszony òjc òstawił białkã i zwiornął. Czej zaatakòwónô wezwała pòlicjã i ò wszëtczim òpòwiedzała, szandarzë zaczãlë szëkbã za atakòwnikã, le òn sóm zgłosył sã na kòmendã i przëznôł sã, że próbòwôł zabic białkã. Pò ji zadëszenim chcôł wjachac aùtołã w drzewò. Chłop òstôł zatrzimóny i aresztowóny na trzë miesącë, le za zadóné mù òbwinë mòże dostac nawetka dosmiertną sôdzã.

H.S.Sz.