Reklama

Dzewiãcdzesąt tësący wëcygnãło w pùstiniã

Klëka

17/12/2025 10:23

https://www.eeg-uae.org/projects/clean-up-uae/

Z rokù na rok rosce lëczba chãtnëch sprzątac pùstiniã w Zjednónëch Arabsczich Emiratach. Do robòtë rëgnãłë całé familie.

Òrganizacjô Emirates Environmental Group jak co rok w gòdnikù przeprowadzëła akcjã sprzątaniô pùstinie w Zjednónëch Arabsczich Emiratach. W latosy edicje wzãło ùdzél wicy jak dzewiãcdzesąt tësący òchòtników – wicy jak mieszkô na przëmiar we Słëpskù. Je to stolëmny rost w przëmierzenim do pierszi edicje dwadzesce sztërë lata nazôd, czej òchòtników bëło sztërë i pół tësąca. Przédniczka Emirates Environmental Group Habiba al-Maraszi scwierdzëła, że akcjô „Pòsprzątac Emiratë” stała sã ju jistną nôrodną rësznotą. Całé rodzëznë wëcygają głãbòk pòmidzë dunë pùstinie al-Rab al-Chali żebë pòzbierac wëzdrzóné przódë z helikòpterów smiecë. Te colemało òstôwiają tam lëdze, jaczi robią tam pikniczi abò terenowé jazdë, tak mieszkańcë Emiratów jak téż trójny turiscë. Célã akcje je bùdowanié spòlëznowi swiądë pòwszechny òdpòwiedzalnotë za nôtërné strzodowiszcze.

H.S.Sz.