Reklama

Òdżin w Madżarsce, jiwrë w Serbie

Klëka

23/10/2025 12:32

Pòzdrzatkòwi òdjimk. Zdrzódło: https://pl.wikipedia.org/wiki/Rafineria_ropy_naftowej#/media/Plik:ShellMartinez-refi.jpg

Cësk zdarzeniô w madżarsczi rafinerie na krajewé gazownictwò mô nie bëc wiôldżi, ale Serbiô prawie mòże stracëc energeticzną sztabilnotã na czile miesący.

W nocë z pòniedzôłkù dwadzestégò na wtórk dwadzestégò pierszégò rujana w petrólkòwi rafinerie w Százhalombatta niedalek Bùdapesztu w Madżarsce wëbùchł òdżin. Pò czile gòdzënach ùdało sã gò ùgasëc. Rafineriô słëchô madżarsczémù kòncernowi MOL, jaczi kòl pòlsczégò Òrlenu je jedną z nôwikszich petrólkòwò-gazowniczich pòdjimiznów Westrzédny Eùropë. Wedle òbtaksowaniów znajarzów òdżin sprawi stratã sztërdzescë procent przerobòwi mòcë zôkładu na czile miesący. Chòc cësk na madżarsczi rënk nie bãdze za wiôldżi, w drãdżi stojiznie bãdze terô Serbiô, do jaczi MOL doczëznã ekspòrtowôł.
Òd zôczątkù rujana weszłë w żëcé sankcje òd Zjednónëch Stanów na serbsczi kòncern NIS, jaczi zarzãdzywô jedurną rafinerią w kraju, a rusczi Gazprom nie przedłużił trzëlatnégò ùgôdënkù na dotëgòwiwanié zemnégò gazu do Serbie. Z analizów wëchôdô, że Serbiô terô ni mô jinszich mòżebnosców strzimaniô energeticznégò krizysu, jak leno ùnieważnic ùdzéle rusczich subiektów w swòji energeticzny pòdjimiznie, za co Amerika prawie nałożëła sankcje. Wéńscé w sztrid z Ruską terô równak mòże sprawic wiôldżé niezadowòlenié nacjonalisticznégò elektoratu.