Reklama

Elon Musk pierszim biliónérą

Klëka

15/06/2026 17:14

Zdrzódło: https://pl.wikipedia.org/wiki/Plik:Elon_Musk_-_54820081119_(3x4_cropped,_Rule_of_thirds).jpg

"Newsweek" pòdôwô, co Musk mógłbë zrobic za bilión, żelë bë gò miôł w gòtówce. Òxfam gôdô ò zagrôżbie dlô demòkracje.

Wedle nônowszich rapòrtów majątk Elona Muska pò wlézenim na amerikańską gełdã firmë SpaceX przekrocził bilión amerikańsczich dolarów. Wikszosc tegò je ùlokòwónô w wëcmaniznach taczich jak SpaceX czë Tesla. Ni mógłbë òn tedë narôz pòsprzedawac akcjów i wëcygnąc bilión w gòtówce, le wcyg sëma bùdzy zòbrazënã. Amerikańsczi cządnik Newsweek przërëchtowôł articzel, w jaczim wëwidnił, co bë szło zrobic za bilión dolarów. Je to wôrtnosc dwùch miesąców dzejaniô rządu Zjednónëch Stanów. Szłobë taką sëmą zapłacëc téż za rok amerikańsczich wëdôwków na òbarnã. Majątk Muska mòże sã równac z Krajewim Produktã Brutto taczich krajów jak Szwajcarskô. Za bilión dolarów szłobë w Zjednónëch Stanach kùpic przez dwa miliónë chëczi – mógłbë tej wëkùpic całé amerikańsczé miasto, jak na przëmiar Chicagò, i jesz bë mù òstało. Czejbë chcôł rozdac dëtczi równo na wszëtczé domôcé gòspòdarstwa w Stanach, kòżdé dostałobë kòl sétmë tësący òsmëset dolarów. Mógłbë rozdac kòżdémù na Zemi pò sto dolarów i dali béłbë westrzód dzesãc nôbògatszich lëdzy na swiece. Dałobë sã za bilión teòreticzno pòstawic téż cziledzesąt latawiszczów. Wënik wëcmaniznów biliónérë skòmentowała midzënôrodnô humanitarnô òrganizacjô Òxfam, jakô zajimô sã biôtką z głodã na swiece i pòmòcą rozwijającym sã krajóm. „To, że Elon Musk dożdôł sztatusu biliónérë, òznôczô ùsadzenié nowégò wëszińca òligarchie i czôrny dzéń dlô demòkracje” – rzekł Nabil Ahmed, starszi direktór do sprôw ekònomiczny sprawiedlëwòscë w Òxfam America.

H.S.Sz.

Źródło i opracowanie własne