W Parizu szefòwie eùropejsczich rządów przedstôwcowie Eùropejsczi Ùnie i NATO òglowò ùgôdelë pòspólną pòlitikã bezpiekù przed docygóną ruską agresją.
W pòniedzôłk sétmënôstégò gromicznika eùropejsczi wódcë pòtkelë sã w Parizu na niefòrmalnym zetkanim zwòłónym przez prezydenta Francje Emmanuela Macrona. Szefòwie rządów Dëńsczi, Francje, Italsczi, Niemiecczi, Pòlsczi, Szpańsczi i Wiôldżi Britanie w grëpie z przédniczką Eùropejsczi Kòmisje Ursulą von der Leyen, szefã Eùropejsczi Radzëznë Antonio Costą i generalnym sekretérą NATO Markã Rutte gôdelë ò pòspólny pòlitice Eùropë wedle wòjnë na Ùkrajinie i slédnëch deklaracjów Zjednónëch Stanów, jaczé na Mnichòwsczi Kònferencje Bezpiekù dałë do zrozmieniô, że zagwësnienié bezpiekù Eùropie ju nie je prioritetã dlô Americzi. Nie bëłë pòdjimóné niżódne decyzje, bò zéńdzenié miało czësto diskùsjowi charakter. Bëtnicë zetkaniô bëlë zgòdą, że Eùropie słëchô zwikszëc gwôsné wëdôwczi na òbarnã i nie pòdchadac do tegò jak do tramòwaniô dëtków. Òbgadiwónô bëła ùdba wësłaniô na Ùkrajinã wòjsków niechtërnëch eùropejsczich krajów ju pò zawiarcym miru z Rusją, le wódcë pòdsztrichiwelë, że wcyg je za wczasno na maklewné deklaracje w ti sprawie.
H.S.Sz.
Twoje zdanie jest ważne jednak nie może ranić innych osób lub grup.
Komentarze opinie