Reklama

Ewakùòwelë premiérã Aùstralie z jegò dodomù

Klëka

26/02/2026 17:58

A. Albanese; zdrzódło: https://en.wikipedia.org/wiki/Anthony_Albanese#/media/File:Anthony_Albanese_portrait_(re-crop).jpg

W sedzbie szefa rządu rozłożoné miałë bëc wëbùchòwé ladënczi. Alarm béł falszëwi.

We wtórk dwadzestégò czwiôrtégò gromicznika przëjachóné do Aùstralie chińsczé tuńcowné karno Shen Yun dostało na mailową kastã wiadë z grozbama. Napisóné w nich bëło, że w Canberrze w sedzbie premiérë Aùstralie Anthonégò Albanese rozłożoné je wiele wëbùchòwëch ladënków òpiartëch na nitroglicerinie. Nadôwca pisôł, że jeżlë grëpa dô sã na realizacjã zaplanowónëch w Aùstralie wëstãpów, ladënczi òstóną zdetonowóné, a sedzba premiérë spłënie krëwią. Karno natëchstopach pòinfòrmòwało pòlicjã ò dostónëch wiadach. Ò szósti wieczór premiéra Anthony Albanese òstôł ewakùòwóny ze swòji chëczë wëcmanim z rodzëzną i robòtnikama jegò bióra. Służbë przesznëkrowałë bùdink bôczlëwie, ale nic nie nalazłë. Grozbë, jaczé miałë nie dopùscëc do wëstãpù tuńcownégò karna, mògłë pòchadac òd jegò procëmników. Do tëch nôleżi chińsczi rząd. Shen Yun òstało bò ùsadzoné przez nôleżników zakôzóny w Chińsczi Lëdowi Repùblice religiowi grëpë Falun Gòng, jaczi wëznôwce w dzewiãcdzesątëch latach brelë ùdzél w procëmrządowëch protestach. Do zamkłoscë wëstãpów tuńcownicë mają téż przeszmùglowëwac krëjamné wiadła procëm Kòmùnisticzny Partie Chin. We strzodã dwadzestégò piątégò gromicznika rzeczniczka chińsczégò Ministerstwa Bùtnowëch Sprôw Maò Ning przekôzała, że chòc rząd przestrzégô przed pòzwôlanim na wëstãpë karna w jinëch krajach, to sprocëmniwô sã jaczimlebądz brutalnym atakóm i ni mô nic do ùczinkù z wësłónyma grozbama.

H.S.Sz.

Źródło i opracowanie własne