Nowi sztrôfny zakłôd pòwstónie w zamòrsczim teritorium Francje. Zwòzëc tam bãdą hańdlarzów narkòtikama i terroristów.
Minister Sprawiedlëwòscë Francje Gérald Darmanin dôł do wiadë w niedzelã òsmënôstégò maja, że w dżunglë we Francësczi Gùjanie w regionie Saint-Laurent-du-Maroni wëbùdowónô òstónie nowô sôdza ò zaòstrzony kãdarze. Całi zakłôd mô pòmiescëc piãcset przesprôwców, a wëdzelony w nim bãdze téż part dlô tëch nôniebezpieczniészich. Trafiac tam mają lëdze zamiészóny w hańdel narkòtikama, tak z Francje jak z ji zamòrsczich teritoriów jak Francëskô Gùjana, a téż islamsczi terroriscë. Bùdacjô bãdze kòsztowała kòl sztërësta miliónów eùro. Òdemkniãcé sôdzë mòże bëc ju za trzë lata. Je to òdpòwiesc francësczégò rządu na za wiôldżi scësk w jinszich zamòrsczich sôdzach, a téż jiwer łączbë sôdzewëch z przesprôwcama na wòlë w kòntinentalny Francje.
H.S.Sz.
Twoje zdanie jest ważne jednak nie może ranić innych osób lub grup.
Komentarze opinie