Młodi Rumùnowie z serocyńców bëlë wëwòżony do madżarsczi stolëcë, gdze mielë robic a żëc w niewòlniczëch warënkach. Jich robòtodôwôcze òstelë aresztowóny, a jich majątczi skònfiskòwóné.
Pò pòspólny akcje madżarsczi i rumùńsczi pòlicje 7 lëdzy òstało zatrzimónëch i òbskôrżonëch ò ùprowôdzanié lëdzy z Rumùńsczi i przëmùsziwanié jich do robòtë nad sëłë a téż mieszkaniô w niewòlniczëch warënkach. Szesc z nich to nôleżnicë jedny rodzëznë z gardu Sfântu Gheorghe w krézu Covasna w Rumùńsczi. Drobnotë akcje pòlicje òbëdwùch krajów dałë medióm do wiadë w piątk 15. smùtana.
Za cél brelë so młodëch lëdzy wëchòwónëch w serocyńcach, jaczim bédowelë letczi zôróbk. Przewòzëlë swòje òfiarë w pôrach do Bùdapesztu, gdze zabiérelë jima dokùmentë i kôzelë robic w przédny rédze w zakładze recyklingù òdpadów. Pòlicjô pòznała juwernotã 30 przetrzëmiwónëch persónów, ale szkòdowónëch je mést wiele wicy – przesprawczé dzejanié ùprowôdników dérowało nômni òd 2013 rokù. Pòrwóny mieszkelë w barakach pò 25 sztëk lëdzy, robilë òd 12 do 24 gòdzyn na dobã, a dostôwelë za to baro môłé dëtczi. Pò robòce w zakładze bëlë zmùsziwóny do zjiscywaniô jesz jinëch przësłëgów. Bëlë téż òfiarama fizyczny przemòdżi.
W czasu, czej sprôwcë òstelë aresztowóny w Rumùńsczi, madżarsczi szandarzë skònfiskòwelë w słëchającëch jima môlach kòl 100 tës. eùro, biżuteriã, aùtołë, zabróné òfiaróm dokùmentë a téż barniã.
H.S.Sz.
Twoje zdanie jest ważne jednak nie może ranić innych osób lub grup.
Komentarze opinie