Reklama

Gduńsk krajewą stolëcą atomù?

Klëka

20/11/2025 12:40

Òdj. mat. Polskie Elektrownie Jądrowe sp. z o.o.

Marszôłk je rôd z gôdczi ò ùsadzenim bióra Pòlsczich Atomòwëch Elektrowniów we Gduńskù i zrobienim z niegò nowi sedzbë wëcmaniznë. Widzy w tim szanse na rozwij regionu.

W związkù z bùdacją atomòwi elektrownie w gminie Chòczewò, pòmòrsczé wëszëznë, midzë jinszima marszôłk Mieczësłôw Struk, pòdjimałë w slédnym czasu témã przenieseniô sedzbë Pòlsczich Atomòwëch Elektrowniów z Warszawë do Gduńska. Sama wëcmanizna téż zapòwiôdała zwikszenié swòji bëtnoscë w regionie i òdemkniãcé nowégò bióra we Gduńskù. Terô marszôłk na spòlëznowëch mediach pòdzelił sã jesz nieòficjalnyma wiadłama z Warszawë, że rząd chce dac zgòdã na przeniesenié sedzbë wëcmaniznë na Pòmòrzé. Mô to pòmòc w kòndicje regionu, jaczi miôł dëtkòwé stratë pò wparłãczenim Lotosu i Enerdżi do karna Òrlen. Wskôzôł téż, że we warszawsczim biórze robi dosc tëli Pòmòrzanów, a zarządzanié pierszą atomòwą elektrownią, jakô ju òd dwa tësące trzëdzestégò piątégò rokù mô miec bùdacjã pierszégò blokù skùńczoné, mùszi sã dzejac na placu. Marszôłk zapòwiedzôł, że drobnotë òkòma przenieseniô bãdze wiedzec pò òdwiôdënach Pòmòrzégò przez wiceministra energie Wòjcecha Wrochnã pòd kùńc smùtana.

H.S.Sz.