Karól Nawrocczi òdwiedzył bòksersczi klub swòjégò drëcha i mùzeùm, jaczim czerowôł przez piãc lat. Przëparłãcził sã téż do głosów procëmnëch titlowi głosnégò wëstôwkù z Mùzeùm Gduńska: „Naji knôpi”.
Nowi prezydent Karól Nawrocczi na swòje pierszé prezydencczé òdwiôdënë wëbrôł rodny Gduńsk. Pierszi plac, w jaczi pòjachôł, to Bòksérsczi Klub Brzostk Top Team przë szasëje Élektrików, prowadzony przez jegò drëcha Maceja Brzostka. Tam prezydent wzął ùdzél w Memòriale miona Jana Biandżi, na jaczim pòdczorchnął, że ten znóny piscownik z Sopòtu òb drëgą swiatową wòjnã nie pòdpisôł niemiecczi volkslistë i przeżił òkùpacjã w kòncentracjowëch lôgrach. Pòtemù Nawrocczi pòjachôł złożëc kwiatë pòd pamiãtnikã Witolda Pilecczégò pòd Mùzeùm Drëdżi Swiatowi Wòjnë, jaczégò béł direktorã òd dwa tësące sétmënôstégò do dwa tësące dwadzestégò pierszégò rokù. Bënë mùzeùm zwiedzył przédny wëstôwk i dôł przemòwã, w jaczi gôdôł ò sztridach z łońsczégò rokù tikającëch sã ekspònowaniô na ni pòstacjów pòlsczich herojów Witolda Pilecczégò, rodzëznë Ùlmów i swiãtégò Maksymiliana Marie Kòlbégò. Òb swòjã wizytã we Gduńsku prezydent pòdpisôł téż dwie peticje: Jednã ò to, żebë w Mùzeùm Drëdżi Swiatowi Wòjnë przédny wëstôwk wëzdrzôł tak, jak przed zjinakama zrobionyma łoni w czerwińcu, a drëgą, żebë w Mùzeùm Gduńska zmienic pòzwã głosnégò w slédnym czasu wëstôwkù „Naji knôpi. Mieszkańcë Gduńsczégò Pòmòrzégò w armie Trzecy Rzeszë” a téż „przëwrócëc historiczné faktë”.
H.S.Sz.
Twoje zdanie jest ważne jednak nie może ranić innych osób lub grup.
![Co? Dze? Czedë? [30.06-6.07]](https://cdn.cmc-gallery.pl/static/files/gallery/590/thumb__1699237_1751271124.webp)
Komentarze opinie