Głos młodëch głosno a wërazno ùczëti w Kartuzach

Promòcjô zwãkòwi wersje ksążczi bëła leżnoscą do wôrtnëch òbgôdków znaczącëch sprôw dlô kaszëbsczi juwernotë w mòdernym swiece. Swòje pòzdrzatczi zestawilë szkòlôcë i szkólny.

We czwiôrtk trzecégò łżëkwiata Òglowòsztôłcącé Liceùm miona Hieronima Derdowsczégò w Kartuzach gòscëło bëtników wëdarzeniô „Scygnąc miesądz. Przińdnota młodëch jich òczama. Kôrbiónczi”. Titel pòtkaniô narzesziwô do ksążczi Karolënë Serkòwsczi-Secechòwsczi, jaczi zwãkòwô wersjô òstała wëdónô łoni na platkach w òbrëmim projektu „Akademiô Kaszëbsczi Bôjczi”, we wespółrobòce Kaszëbskò-Pòmòrsczégò Zrzeszeniégò z Radiã Gduńsk. To prawie w jegò sztudiu òpòwiôdania z ksążczi przeczëtelë szkòlôcë, sztudérzë, szkólny i rodzëzna aùtórczi, jaczi bëlë gòscama wëdarzeniô. Pò rozdanim jima dzãkòwnëch diplómów i platków z aùdiobookã, przëszedł czas na intelektualné diskùsje z przédnym ùdzélã ùczniów czilenôsce wëżispòdlecznëch szkòłów z całëch Kaszub – ti kôrbilë ze sobą w mòderowónëch stolikòwëch debatach przë kawie i kùchù, jaczich brzadã bëłë piãcminutowé prezentacje pòspólnëch wniósków, do jaczich doszło karno. Te bëłë pòtemù zestawioné z trzëminutowima prezentacjama szkólnëch kaszëbsczégò jãzëka, chtërny swòje debatë przërëchtowelë w kartësczim Centrum Kùlturë.
Widzec bëło zaangażowanié i zainteresowanié ùczãstników témama wôżnyma dlô juwernotë młodëch, jak wëzwania w ùczbie kaszëbsczégò w szkòle, wôrtnosc wëzwëskiwaniô kaszëbiznë w dozdrzeniałim żëcym, wespółrobòta pòkòleniów dlô regionu, bùdacjô pòzdrzatkù na Kaszëbów, bédënczi institucjów kùlturë czë dzysdniowô bëtnosc kaszëbiznë. We wszëtczich tëch témach colemało padałë apelë młodëch ò wspiarcé i zôchãcbë òd stôrszich dzejarzów do pòdjimniãców, pòwôżné pòdchôdanié do nôùczi kaszëbiznë w szkòłach, twòrzenié wicy leżnosców w pùbliczny rëmie do gôdaniô pò kaszëbskù i mòderniészé zdrzenié na mòżebnoscë promòcje i wëzwëskaniô kaszëbsczi juwernotë.
Pò zakùńczenim debatów, jich pòdrechòwanim i pòdzãkòwanim wszëtczim ùczãstnikóm i gòscóm, chãtny pòszlë téż na krótką wanogã do kartësczi kòlegiatë, gdze bënë i bùten kòscoła Katarzëna Czedrowskô-Zagòzdón òpòwiedzała pò kaszëbskù ò historie przëbëcô zôkònu kartuzów na Pòmòrzé i zôczątkach gardu Kartuzë.

H.S.Sz.