Sztatus nôrodny mniészëznë mô zagwësnic Góralóm ùdëtkòwienié òd państwa i reprezentacjã przë rządowëch radzëznach.
Òb czas wëjazdowégò zetkaniô w Czerwionym Klôsztorze w Pieninach rząd Słowacczi òficjalno ùznôł Góralów za piãtnôstą nôrodną mniészëznã w kraju. Dlô Góralów òznôczô to mòżebnosc ùdostôwaniô dëtków na rozwij swòji kùlturë z bùdżetu państwa, a téż góralską reprezentacjã kòl rządowi radë do sprôw nôrodnëch mniészëznów. Slédną mniészëzną, ùznóną przez Słowackã bëlë Wietnamczicë. W słowacczim nôrodnym spisënkù lëdztwa w 2021 góralską nôrodnosc zadeklarowało 5273 sztëk lëdzy, a wedle òbtaksowaniów góralsczich dzejarzów w całi Słowacce żëje jich kòl 70 tësãcy. „Dlô Góralów je to satisfakcjô, bò góralskô spòlëzna mô òbsadzoné całą nordową Słowackã, òd Stôri Lubòwnie jaż pò górné Mòrawë, pò Jabłonkòwò. Më jesmë òsoblëwi, bò w tim strzodowiszczu, w jaczim roscemë, gdze sã sztôłtëjemë, wëznôwómë wôrtnotë taczé jak robòcosc, òdpòwiedzalnosc, rodzëzna czë wiara w Bòga. Chcemë, żebë góralskô kùltura òstała ùchòwónô dlô przińdnëch pòkòleniów” – gôdô góralsczi dzejôrz i starosta gminë Ždiar, Pavol Bekeš.
H.S.Sz.
Twoje zdanie jest ważne jednak nie może ranić innych osób lub grup.
Komentarze opinie