Badérowie przeszukelë grzëpë ùsëpóné na pòchówczi. W sëmie nalezlë sétmë grobów w trzech ùspach.
Prasowé bióro Gdinie dało do wiadë, że archeòlogòwie, jaczi robią przë bùdacje òbjazdu Witomina, rozpòznelë trzë ùspë z sétmë grobama. Badérowania pierszi ùspë òstałë skùńczoné. Bëłë w ni kamiannô skrziniô z pòpielnicą, charakteristicznô dlô kaszëbsczi grëpë łużëcczi kùlturë, jakô żëła na Pòmòrzu òd tësąc do sétmëset lat przed Christësã, a téż jamòwi grób z przepôlonyma gnôtama. W drëdżi ùspie badérowie nalezlë midzë jinszima skrzinkòwé grobë, w jaczich pòpiołë swòjich ùmarłëch chòwelë przedstôwcë pòmòrsczi kùlturë, midzë sódmim a szóstim stalatim przed Christësã. Na trzecy ùspie badérowania dopiérze sã zaczãłë. Archeòlgòwie sprôwdzą téż całą òbéńdã wkòl ùspów, bò rechùją na to, że nalézą tam jinszé pòchówczi, jaczé czasã bëłë ùsadzoné w òkòlim samëch grzëpów. Wiceprezydent Gdinie Bartłomiéń Aùsten przekôzôł, że teren wkòl nalézëszczów je zabezpieczony, a robòtë wkòl niegò pòdérëją dwa-trzë tidzenie. Na nédze òbéńdë przińdłégò òbjazdu Witomina bùdacjô jidze zgódno z planã.
H.S.Sz.
Twoje zdanie jest ważne jednak nie może ranić innych osób lub grup.
Komentarze opinie