Òkrãt z toksycznyma chemikaliama wjachôł w òkrãt z latawnym òpałã. Doszło do czile wëbùchów, jeden maréna zadżinął.
W pòniedzôłk dzesątégò strëmiannika reno na Nordowim Mòrzu kòl anielsczégò pòrtu Hull pòrtugalsczi kòntenerówc Solong, jaczi wiózł toksyczné chemikalia, grzimnął w zakòtwionégò amerikańsczégò tankówca MV Stena Immaculate, na jaczim béł latawny òpôł dlô amerikańsczégò wòjska. Òba òkrãtë sã zapôlëłë, a part òpału wëlôł sã do mòrza. Òbsada trzëdzescë szesc marénów z tankówca òstała ùretónô i nalazła sã na sztrądze, z czegò jedna òsoba mùszała bëc zabrónô do bòlëcë. Na kòntenerówcu bëło sztërnôsce sztëk lëdzy, le dérëje szëkba za jednym zadżinionym maréną. Dzãka krótëchnoscë pòrtu w Hull ògniarze i retownicë chùtkò nalezlë sã kòl płonącëch òkrãtów. Ùgaszenié ògnia na nich równak nie je prosté – pò dwanôsce gòdzënach òd zdarzeniô ògniarze wcyg biôtkòwelë z płomieniama. Z pòzdrzatkù na zderzenié dwùch ladënków z toksycznyma substancjama je rizyko, że òb akcjã retowné służbë mògłë ùcerpiec òd lëftu zatrëtégò dëmã. Britijsczi Greenpeace wstãpno wskazéwô na mòżebną wiôlgą zaszkòdã dlô strzodowiszcza w związkù z kòlizją.
H.S.Sz.
Twoje zdanie jest ważne jednak nie może ranić innych osób lub grup.
Komentarze opinie