Pò decyzje rządu òdcëgający rozmòwë ò eùropejsczi integracje na sztërë lata òpòzycjô zôs zaczãła procëmrządowé demònstracje.
We czwiôrtk 28. smùtana premiéra Grëzóńsczi Irakli Kobachidze ògłosył, że Grëzóńskô zriwô rozmòwë ò doparłãczenim do Eùropejsczi Ùnie do 2028 rokù, a téż rezygnëje ze wszëtczich dostôwónëch òd ni bùdżetowëch grantów. Wedle premiérë krôj mòże przëłãczëc sã do eùropejsczi pòspólnotë nôwczasni w 2030 rokù. Decyzjô rządu czerowónégò przez partiã Grëzóńskô Rojitwa pòtkała sã z wiôldżim sprocëmnienim. „Dzys nielegalny rząd wëpòwiedzôł wòjnã gwôsnémù nôrodowi” – pòdskacywa òpòzycjã prozôpadnô prezydentka Salome Zurabiszwili.
Ju òd dobëcô slédnëch parlamentarnëch welacjów przez rządzącą partiã, przedstôwcowie òpòzycje òrganizowelë trójné protestë w gardach, le pò ògłoszenim premiérë nabrałë òne mòcë. W biôtkach demònstrantów z szandarama w samim Tbilisi wiele lëdzy bëło renionëch, midzë jinszima 20 gazétników i 30 szandarów. Służbë ùżiwają procëm protestëjącym gaz i kanónczi z mieszónką wòdë z chemikaliama. Do protestów dołączëło téż 114 robòtników grëzóńsczégò Ministerstwa Bùtnowëch Sprôw, jaczi pòdpiselë lëst kritikùjący decyzjã rządu. Pòstãpné resortë rëchtëją szlachòwné deklaracje.
H.S.Sz.
Twoje zdanie jest ważne jednak nie może ranić innych osób lub grup.
Komentarze opinie