Warającé wnetka sztërë tidzenie zawieszenié barnie midzë Izraelã a Hamasã mòże sã skùńczëc. Òbie starnë winëją sã ò łómienié jegò pòstanowieniów.
Przëjãté dzewiãtnôstégò stëcznika zawieszenié barnie midzë Izraelã a Hamasã mòże stracëc mòc chùdzy jak bëło ùdbóné. Hamas strzimôł wëmianã izraelsczich pòjmańczików na palestińsczich sôdzewëch, co bëło jedną ze spòdlowëch załôżbów zawieszeniô, przez to, że Izrael wedle niegò łómił jinszé warënczi ùgôdënkù – Hamas òbskarżiwô procëmnika ò wëwòłanié czile strzélingów i nieprzepùszczanié humanitarny pòmòcë. Izrael przékùje òbwinóm i zapòwiôdô òdpòwiesc. „Żelë Hamas nie zwrócy najich pòjmańczików do pôłniô w sobòtã, z zawieszenim barnie mdze kùńc, a Zbrojné Sëłë Izraela zôs rëgną z òstrą biôtką jaż do cawnégò znikwieniô Hamasu” – ògłosył premiéra Izraela Benjamin Netanjahu. Na wëpùszczenié w pierszim etapie zawieszeniô barnie żdże dzewiãc pòjmańczików, z czegò wedle planu w tã sobòtã miało bëc wëpùszczoné trzech. Netanjahu nie rzekł, czë pòstawiony warënk tikô sã nëch trzech, czë wszëtczich, jaczi mielë òstac wëmieniony w pierszim etapie.
H.S.Sz.
Twoje zdanie jest ważne jednak nie może ranić innych osób lub grup.
Komentarze opinie