Reklama

Heroja z Kaszëb w bitwie ò Angliã – pilot Józef Jeka

Klëka

19/10/2025 10:30

Mjr Józef Jeka (1917-1958), mësliwsczi as – strącył wicy jak 5 fligrów wroga, pilot w britijsczim RAF-ie a pòlsczich diwizjonach m.jin. 308 i 306, w 1946 r. wódca negò slédnégò. Grafika: J. Grudnik

W 1917 rokù w Tëpadlach na nordze Kaszëb béł ùrodzony Józef Jeka – pilot, as mësliwsczi, heroja 2. swiatowi wòjnë.

Stowôra Drëchów Mùzeùm Pùcczi Zemi, chcącë przëbôczëc pòstacjã negò, wcyg mało znónégò na Kaszëbach człowieka, ùdbała so zrëchtowac plasticzné warkòwnie sczerowóné òsoblëwie do dzecy, we wsë, w jaczi majór Jeka béł rodzony.

W czasu nëch warkòwniów ùczãstnicë zapòznelë sã z żëcym pilota, wëkònelë malënczi zrzeszoné z jegò żëcym, a téż skłôdelë mòdele fligrów, na jaczich òn lôtôł.

Brzadã nëch zajmów mdą: wëstawa przërëchtowónô bez KGW „Bëlné BIałczi” z Tëpadlów, jaką bãdze mógł òbzerac do 16 lëstopadnika w kòscelë w Pilëcach, a ksążeczka òpùblikòwónô na starnie Mùzeùm Pùcczi Zemi.

Zadanié ùdëtkòwioné je bez Mùzeùm Historie Pòlsczi we Warszawie w òbrëmim programù „Patriotyzm Jutra”.

Partnérama projektu są Mùzeùm Pùcczi Zemi, KGW „Bëlné BIałczi” z Tëpadlów a Szôłectwò Tëpadla.