Reklama

Historiô stanicë z Lipczëna

Klëka

10/10/2025 11:48

Nowi flaster, nowi dron i stôrô stanica zebrałë mieszkańców gminë Liniewò w kòscérsczim krézu.

W niedzelã piątégò rujana w Lubieszënie w gminie Liniewò bëła ùroczëzna z leżnoscë kùńca robòtów òkòma remizë môlowi Òchòtniczi Ògniowi Starżë. Na placu przed remizą pòłożony béł flaster, co miało przesłużëc sã ògniarzóm a téż ùprawic wëzdrzatk òkòlégò. Inwesticjô bëła zjisconô dzãka mieszkańcóm, jaczi sami przez szesc tidzeniów kłedlë kòstkã bez bùtnowëch firmów. Bëła to téż òrãdz do przekôzaniô remize drona, jaczi dlô ni kùpiła gmina ze swòjich òbszczãdnosców. Wójt gminë Liniewò Mirosłôw Warczôk sóm przekôzôł sprzãt dlô ògniarzów na rãce szôłtësa Wòjcecha Bòrowicczégò. Przë tim òdtaconô òstała téż stanica przedwòjnowégò lipczińsczégò partu Katolëcczi Stowôrë Białczi Młodzëznë, jaką przëtrôfkã nalazłë sostrë klarisczi z Miedniewiców w łódzczim wòjewództwie – tam trafiła ùkrëtô w feretronie Matczi Bòsczi z parafie w Wësënie, chtëren latos w maju miôł bëc tam òdnowiony. Gwës béł tam schòwóny w czasu drëdżi swiatowi wòjnë. Pò òdnowienim wrócył na Kaszëbë, a terô bãdze wisôł w remize w Lubieszënie.