Przëjimniãcé paliusza i Piestrzenia Rëbôka z rãk kardinałów symbòliczno zaczãło pòntifikat wëbrónégò dzesãc dni nazôd kardinała Roberta Prevosta, dzys ju papieża Léòna.
W niedzelã òsmënôstégò maja w Watikanie na Placu Swiãtégò Piotra òdprawionô òstała inaùgùracjowô mszô nowégò papieża Léòna. Zaczãła sã ò gòdzënie dzesąti przed pôłnim i dérowała kòl dwùch gòdzyn. Na plac pòzeszło sã dwasta tësący lëdzy, a òficjalnëch delegacjów z krajów i institucjów z całégò swiata bëło sto szescdzesąt piãc. Mszã kòncelebrowało kòl sztërë tësące ksãżi, w tim prowôdnik Kònferencje Episkòpatu Pòlsczi i gduńsczi arcybiskùp Tadeùsz Wòjda. W homilie papiéż gôdôł ò òpiarcym służbë nastãpnika swiãtégò Piotra ò òfiarnosc, wedle miłoscë, jaczi ùcził Christus, bez brëkòwaniô dominacje, religiowi propagandë i nôrzãdłów włôdzë. Òb mszã papiéż Léón przëjął paliusz i Piestrzéń Rëbôka, jaczé nałożëlë mù kardinałowie Mario Zenari, Fridolin Ambòngò i Luis Antonio Tagle. Pò òbrzãdach rituału ùsłësznotë z ùdzélã przedstôwców dwanôsce stanów Kòscoła z papieżã pòtkałë sã zjachóné delegacje żebë pòwinszowac mù zdarnégò pòntifikatu. H.S.Sz.
Twoje zdanie jest ważne jednak nie może ranić innych osób lub grup.
Komentarze opinie