Reklama

Institut Nôrodny Pamiãcë znôwiô wëdowiédzã w sprawie smiercë Antóna Browarczika

Klëka

23/10/2025 11:52

Print screen ze starnë https://ipn.gov.pl/pl/

Winny zabicégò dwadzescejedenlôtka wcyg ni mają dostóné sztrôfë, a Institut chce doprowadzëc do jich identifikacje.

We strzodã dwadzestégò drëdżégò rujana zastãpnik przédnika Institutu Nôrodny Pamiãcë Karól Pòlejowsczi ùdzelił prasowi kònferencje pòd Pamiãtnikã Òfiaróm Wòjnowégò Ùstawù na Rekòwim Targù we Gduńskù. Dôł do wiadë, że institut mô ùdbóné znowic wëdowiédzã w sprawie smiercë Antóna Browarczika, jedny z nômłodszich òfiarów wòjnowégò ùstawù, zabitégò z maszingewérë kòl Wëżawny Brómë sétmënôstégò gòdnika tësąc dzewiãcset òsmëdzesątégò pierszégò rokù. Pòzwòlëc na to miało nalézenié w archiwach nowëch materiałów. Andrzéj Pòzorsczi z wëdowiédzowégò pionu Institutu przekôzôł, że jidze ò dokùment Przédny Kòmendë Òbëwatelsczi Milicje, w gdze są òpisóné wëdarzenia z tamtégò dnia, w jaczim dwadzescejedenlatny Browarczik zdżinął, a trzë òsobë bëłë renioné. Institut chce sã téż zajic kwestią ùtrëdniwaniô ùszłëch, przerwónëch pòstãpòwaniów w ti sprawie, żebë nié blós przëzdrzec sã szandaróm, jaczi strzélelë do cywilów, ale téż nym, co jich krëlë.

H.S.Sz.