Reklama

Irańską szkòłã dlô dzéwczãt trafilë Amerikanie

Klëka

09/07/2026 22:30

Òdj. Mehr News Agency; zdrzódło: https://pl.wikipedia.org/wiki/Atak_na_szko%C5%82%C4%99_w_Minabie#/media/Plik:Shajareh_Tayyebeh_school_in_Minab_photos_from_Mehr_(3).jpg

Bùdink szkòłë béł wpisóny do bazë dónëch ò célach, w jaczé mają ùderzëc amerikańsczé rakétë. Trzënôsce lat nazôd béł to wòjskòwi teren.

Szkòła dlô dzéwczãt w Minabie òstała trafionô w rakétowi atace dwadzestégò ósmégò gromicznika, w pierszi dzéń najachùnkù Zjednónëch Stanów ë Izraela na Iran. Zdżinãło tedë sto sétmëdzesąt piãc szkòlôczków i szkólnëch. Òdpòwiedzalnosc za atak Iran przëpisywôł Izraelowi, a Zjednóné Stanë samémù Iranowi, jaczi miôł lëchò wëmierzëc swòje patrónë. Nônowszé pòdôwczi amerikańsczich mediów wskazéwają, że to prawie amerikańskô armiô ùderzëła w szkòłã. Teren, na jaczim òna stojała, béł wpisóny na lëstã célów na spòdlim materiału wëdowiédzë zebrónégò w dwa tësące trzënôstim rokù. Tedë béł to teren irańsczi bazë wòjnowi marinarczi. W dwa tësące szestnôstim równak jeden bùdink béł wëdzelony płotã, a w gòdnikù łońsczégò rokù satelitarné òdjimczi pòkazéwałë ju rzmã dzecy na jigrowim placu. Zaktualizowóné pòdôwczi nie òstałë równak pasowno przekôzóné do bazë amerikańsczégò wòjska, jaczé zjinaczi wprowadzëło leno òkòma môlów rësznëch rakétowëch stanowiszczów i grozniészich fligrów. Tã wersjã pòdôwają media. Armiô Zjednónëch Stanów jesz ji nie pòcwierdzywô, bò dérëje wòjskòwô wëdowiédzô w ti sprawie. Atak z dwadzestégò ósmégò gromicznika Islamskô Repùblika Iranu ùznała za wòjnową zbrodniã.

H.S.Sz.

Źródło i opracowanie własne