Pò zabicym przédnëch wëszëznów Hezbollahu, Izrael dôwô sã na pòstãpné kroczi procëm wrodżi òrganizacje.
W nocë z pòniedzôłkù na wtórk (30. séwnika – 1. rujana) lądowé wòjska Izraela przeszłë grańcã z Libanã. Pò niedôwnëch atakach izraelsczich służbów na nôleżników Hezbollahu, jaczi je przédną mitarną sëłą w kraju, a téż zabicym w piątkòwim atakù generalnégò sekretérë ti partie, Hassana Nasrallaha, Izrael jidze dali z biôtką procëm ti òrganizacje. Célã wòjskòwi òperacje w Libanie je demòntaż strukturów służącëch do ataków na Izrael. Chòdzy ò céle jaczé są we wsach kòl grańcë. Żôłnérze na lądze mają wspiarcé artilerie i latawiznë.
Premiéra Libanu scwiérdzył, że rząd je w pòszëkù zastãpic wòjska Hezbollahu swòjima wòjskama na terenach kòl grańcë, ale blós pòd warënkã zawieszeniégò barnie midzë Izraelã a Hezbollahã. W swòjim kòmentarzu za zawieszenim barnie òpòwiedzôł sã téż prezydent USA Joe Biden, chtërnégò krôj zapòwiedzôł wësłanié czilë tësãcy dodôwkòwëch żôłnérzów na Blësczi Wschód, co miałobë zagwësnic òbarnã grańców Izraela, czejbë bëło to brëkòwné.
HSz
Twoje zdanie jest ważne jednak nie może ranić innych osób lub grup.
Komentarze opinie