Na òczach 8000 lëdzy mòckò pòdsztrichiwającô swòjã kaszëbską juwernotã Arka Gdiniô dobëła w I lidze fùsbalë.
W niedzelã 29. séwnika na Miesczim Sztadionie w Gdinie béł fùsbalowi mecz Arczi Gdiniô procëm Chrobrémù Głogòwò, w jaczim gòspòdarze dobëlë 2:0 nad karnã z Dólnégò Szląska. Bëło to nié blós spòrtowé wëdarzenié, le téż kùlturalné – na tribùnach midzë òsmë tësącama òbzérników sedzało téż kòl 1500 szkòlôków z rozmajitëch strón Kaszëb, jaczi ùczą sã w szkòłach kaszëbsczégò jãzëka. Całémù meczowi towarzëła fejn-kaszëbskô òprawa, z wëstãpama Tatianë Slowi i Michała Miegònia, òdspiéwanim kaszëbsczégò himnu a téż rotë przez Tomôsza Fópkã. Za spikera robił Adóm Hébel. Arkã dopingòwała téż rzma czôrno-złotëch fanów. Przë klubie òd gromicznika dzejô Radzëzna Kaszëbów, jaczi zadanim je bùdowanié wizerënkù karna w sparłãczenim z kaszëbską kùlturą.
Òbëdwie brómczi w 80' i 86' minuce strzélił atakòwnik Karól Czubôk. Dobëcé nad Chrobrim dało Arce drëdżi plac w I lidze. To ji czwiôrtô w rédze dobëtô rozegra.
HSz
Twoje zdanie jest ważne jednak nie może ranić innych osób lub grup.
Komentarze opinie