Më mielë pisóné ò pòmòcë z Trzëgardu dlô òfiarów zôlewów na Szląskù. Chcemë przebaczëc niechtërne z jinëch akcjów wspiarcégò òrganizowónëch w slédnëch dniach na Kaszëbach.
Pierszô zmiana pòmòrsczich ògniarzów, jakô bëła wësłónô na pôłnié Pòlsczi, wrócëła w piątk pò pôłnim do Dërszewa. Wòjewódzczi kòmendant st. brig. Jack Niewãgłòwsczi pòdzãkòwôł jima za szescdniową pòmòc brëkùjącym. Na Dólnym Szląskù pòmôgô ju drëgô zmiana, jakô dojacha na môl w nocë z piątkù na sobòtã. Na zalónëch terenach są téż pòmòrsczi żôłnérze Wòjsków Òbéńdowi Òbarnë.
We wiele môlëznach na całëch Kaszëbach bëłë òrganizowóné zbiérczi – z pòdskacënkù samòrządów jak téż òddólny. Rëgnãłë téż pierszé transpòrtë z darënkama. W piątk pò pôłnim z Przedkòwa wëjachôł aùtokar z chãtnyma do rëmaniô skùtków zôlewów w Kłodzczi Bëstrzëcë. Ze zbiérków abò jinëch charitatiwnëch akcjów, jaczé bãdą w nôblëższim czasu, mòże wëmienic charitatiwny kòncert na rënkù w Bëtowie w niedzelã 22. séwnika, niedzelną zbiérkã dëtków do bùsków pò mszach we wszëtczich parafiach peplińsczi diecezje, abò dérëjącą jaż do strzodë 25. séwnika rzeczową zbiérkã w Brusach, a do piątkù 27. w Lãbòrgù. Zãchãcywómë do zapòznaniô sã z planama zbiérków w swòjim òkòlim.
Twoje zdanie jest ważne jednak nie może ranić innych osób lub grup.
Komentarze opinie