Reklama

Jo! Dlô pòlsczich pòrtów

Klëka

18/10/2025 17:53

Aùtór: Iwankgb; zdrzódło: https://pl.wikipedia.org/wiki/Ba%C5%82tycki_Terminal_Kontenerowy#/media/Plik:Container_terminals_in_Gdynia.jpg

Karól Nawrocczi chce, żebë rząd dôwôł dëtczi na rozwij pòrtów, co mô pòdwignąc znaczënk Pòlsczi na Bôłce. Przëjachôł do Gdinie, żebë swòjã ùdbã rozkòscerzëc.

W piątk sétmënôstégò rujana prezydent Pòlsczi Karól Nawrocczi béł w Gdinie, w Bôłtëcczim Kòntenerowim Terminalu. Tam pòdpisôł projekt ùstawòdôwczi inicjatiwë „Jo! Dlô pòlsczich pòrtów”. Jak tłómaczi prezydent, je to pòstãpny krok w zjiscywanim jegò welownëch przërzeczeniów. Projekt mô òbrzeszëwac terny rząd do inwesticjów dlô pòrtów, cygnącë dali inwesticjową pòlitikã zaczãtą przez jich pòprzédców. Na lësce przédnëch célów są bùdacje abò téż mòdernizacje w Gdinie, Gduńskù, na Gduńsczi Hôwindze, w Swinoùscym i Szczecënie. Prezydent gôdôł, że pòlsczé pòrtë mògą stac sã òstrzódkã przedażë zemnégò gazu, co mô zagwësnic Pòlsce energeticzny bezpiek. Mówił téż szerzi ò perspektiwach na przińdnotã rzeszącëch sã direktno z Bôłtã: „Bôłt je wiôldżim pòtencjałã pòlsczégò państwa – gòspòdarczim, militarnym, wòjskòwim. Je téż wiôldżim wëzwanim òkòma bezpiekù pòlsczégò państwa”. Dlô pòdsztrichniãcô rolë pòrtów jakno môlu zagrańczny wespółrobòtë, pò pòdpisanim projektu Nawrocczi pòtkôł sã z amerikańsczima żôłnérzama z piãcset dzewiãcdzesąti ósmi Transpòrtowi Brigadë, jakô dozérô rozmiészczaniô amerikańsczégò wòjska w Eùropie.