Na skwerze z pamiãtnikã „Tim co za pòlskòsc Gduńska” szło ùczëc skòpicą kaszëbsczi mùzyczi. Leżnosc na to bãdze téż w sobòtã.
We czwiôrtk dzewiãtnôstégò czerwińca pò pôłnim we Gduńsku na Skwerze miona Maceja Kòsycarza òdemkłi òstôł pierszi dzéń Kaszëbë Festu i kaszëbsczégò jôrmarkù. Strzód celtów ze stojiszczama, na jaczich szło kùpic dokazë kaszëbsczégò a pòmòrsczégò rzemiãsła czë ksążczi z wëdôwiznë Kaszëbskò-Pòmòrsczégò Zrzeszeniégò, stojała bina na jaczi wëstąpiło czile mùzycznëch wëkònôwców: Slavko the Violinist, Karno Piesnie i Tuńca „Gduńsk”, Jóanna Gòstkòwskô razã z ùczãstnikama warkòwniów tradicjowégò spiewù a pózdni téż z gwôsną kapelą Drëszë, rockòwé karno Demòre i wëkònôwca spiéwóny pòezje Paùel Ruszkòwsczi. Gòsce ùczëlë téż, jak wëstôwcë òpòwiôdają ò swòjim rzemiãsle, midzë jinszima ò tak farwnym jak złotnicowim wësziwkù, a ò doswiôdczenim sztudérowaniô kaszëbsczi etnogilologie wëpòwiedzelë sã bëtny sztudérzë drëdżégò rokù. Wëdarzenié na binie prowadzëłë Tatiana Slowi i Marta Majewskô. Je partã dérëjącëch Gduńsczich Kaszëbsczich Dniów. Drëdżi dzéń Kaszëbë Festu w sobòtã dwadzestégò pierszégò czerwińca. Ùczëc tedë bãdze szło Karno Piesnie i Tuńca „Przedkòwianie”, Rëbacką Dãtą Òrkestrã z Jastarnie, karno Ecekón i Bùten Szëkù.
H.S.Sz.
Twoje zdanie jest ważne jednak nie może ranić innych osób lub grup.
Komentarze opinie