Wiada ò ùroczëznie z ùdzélã prezydenta i szefa MNÒ òsta pòdónô z òrãdzë Swiãta Samòstójnotë.
W dzéń pòlsczégò Swiãta Samòstójnotë 11 smùtana szef Bióra Nôrodnégò Bezpiekù Jack Sewiera dôł do wiadë, że w Redzëkòwie kòl Słëpska ju we strzodã òdemkłô òstónie amerikańskô wòjskòwô baza Aegis. W ùroczëznie òdemkniãcô mają brac ùdzél prezydent Andrzéj Duda, wicepremiéra i szef Ministerstwa Nôrodny Obarnë Władisłôw Kòsyniôk-Kamisz a téż przedstôwcowie NATO.
Redzëkòwskô baza mô bëc òbsadzonô żôłnérzama US Navy i słëchac wództwù Eucomù, to je Eùropejsczégò Wództwa Zjednónëch Stanów. Mô rozszerzwic dzejanié antirakétowi tôrczë, a ji gòtowòsc do òdemkniãcô bëła ògłoszonô ju w lëpińcu na szczice NATO we Waszingtonie przez tamtoczasnégò przédnégò sekretérã NATO, Jensa Stoltenberga. Jednostczi, jaczé mają słëżëc w baze, mają bëc fardich na realizacjã zadaniów transatlanticczi òbarnë i sczidiwanié wrodżich rakétów w przëtrôfkù atakù.
H.S.Sz.
Twoje zdanie jest ważne jednak nie może ranić innych osób lub grup.
Komentarze opinie