Jurata i Jastarniô ùgòscëłë kaszëbską młodzëznã

Czas narzeszaniô drëszbów, ùmòcniwaniô swiądë a juwernotë i bëlnégò òdpòczinkù prawie sã skùńcził. Brzôd „Remùsowi Karë” òstónie równak na długò tak z ùczãstnikama jak z òrganizatorama warkòwniów.

Òd czwiôrtkù szóstégò do niedzelë dzewiątégò smùtana dérowała pòstãpnô edicjô warkòwniów dlô szkòlôków z wëżispòdlecznëch szkôł „Remùsowa Kara”, òrganizowónëch przez Klub Sztudérów „Pòmòraniô”. Latos głównym placã warkòwniów béł Szkòleniowò-Wëpòczinkòwi Òstrzódk „Kaper” w Jurace. Tam pierszégò dnia warkòwniów ùczãstników przëwitôł jastarsczi part Kaszëbskò-Pòmòrsczégò Zrzeszeniégò, a przédnik Zrzeszeniô Jón Wërowińsczi i marszôłk Mieczësłôw Struk gôdelë do nich ò dzejaniach wòjewództwa i Zrzeszeniégò w kaszëbsczi i pòmòrsczi zajmie. Pò wieczerzë ùczãstnicë wësłëchelë téż wëkładu Dóminiczi Żemòjtel-Dettlaf ò głosny sprawie mùszowégò wcyganiô Kaszëbów do niemiecczi armie òb czas drëdżi swiatowi wòjnë. W drëdżi dzéń pò frisztëkù profesór Jarosłôw Nowakòwsczi òpòwiôdôł ò tim, jak na kaszëbsczi Nordze przecynają sã migracjowé szlachë ptôchów, co czëni Nordã przez to òsoblëwim i jaczi mòże z tegò cygnąc zwësk dlô regionu. 
Pò pôłnim na jãzëkòwëch warkòwniach prowadzonëch przez Huberta Sylwestra Szirka szkòlôcë robilë nad wëbrónyma przez se tekstama wiadłów z najégò pòrtalu – jich zadanim bëło ùtwórczo je przerobic, a w swòjã robòtã dodôwkòwò wparłãczëc rzôdczé słowa wësznëkrowóné ze słowarza Bernata Zëchtë. Òb wieczór wzãlë ùdzél w integracjowëch zòbawach. W trzecy dzéń przed pôłnim grëpa zwiedzëła Zabëtkòwą Rëbacką Chëcz w Jastarnie a téż przëjachelë sã pò wòdach Gduńsczi Hôwindżi na kaszëbsczich bôtach – pòmòrenkach. Pò pôłnim w òbrëmim Ògardów Lëteraturë ò robòce nad lëteracczim dolmaczenim ksążkôw òpòwiôdôł Róman Drzéżdżón, chtëren téż pòprowadzył lëteracczé warkòwnie w témiznie kaszëbsczi demònologie. Wieczór zetkelë sã z Éweliną Stefańską, jakô gôdała z ùczãstnikama ò tim, co Kaszëbskò-Pòmòrsczé Zrzeszenié mô do zabédowaniô młodim. W kùńcu w slédny dzéń pò frisztëkù szkòlôcë òdebrelë pamiãtnikòwé diplomë za ùdzél w warkòwniach i òddzãkòwelë sã z Pòmòrańcama, w bëlnym ùstawie kùńczącë wôrtny czas integracje, nôùczi i relaksu.

H.S.Sz.