Kaczczi pòd wòdą

Sztërë lata nazôd jiwer mielë mieszkańcë sedlëszcza Chmara we Wiôldżich Trąbkach. Łoni na jeseni tam bëło sëchò, a zalewac zaczãło wies Kaczczi.

We Wiôldżich Trąbkach sztërë lata nazôd skùńczëlë bùdowac nowé sedlëszcze chëczi ùłożonëch wkrąg – Gduńsczé Ògardë, zwóné téż Chmarą. Dorazu jak lëdze zaczãlë tam mieszkac, òkôzało sã, że na tim terenie czãsto stoji wòda. Sedlëszcze je pòstawioné na zalewòwëch terenach i błotkach, jaczé tu bëłë jesz czilenôsce lat nazôd. Òd łońsczégò rokù wòda òprzestała wëbijac na nowim sedlëszczu i skùńczëłë sã interwencje ògniarzów. Jiwer za to mają mieszkańcë wsë Kaczczi. Tamò spłiwô wòda z pól pòmidzë tą wsą a Chmarą. Mieszkańc Kaczk Môrcën Friger doszukôł sã stôrëch dokùmentów, jaczé pòcwiérdzają, że midzë Chmarą a Kaczkama pòd zemią je systém drenażów jesz z prësczégò cządu, jaczima przez dłudżi czas wòda z błotów spłiwała do rzéczczi Stinë. Mieszkańcë Kaczków są dbë, że Gduńsczé Ògardë mògłë òstac nielegalno pòdłączoné do tëch drenażów, co przez fele w mòntażu a téż niedopasowanié elementów mògło sprawic terny jiwer dlô Kaczk. Wies òsoblëwie mòcno zaléwô terô, na pòzëmòwi zeldze. W miniony weekend Zarząd Kòmùnalny i Mieszkaniowi Gòspòdarczi przëwiózł do Kaczk dwadzesce tón piôskù i procëmzaleniowé miechë, ale mieszkańcë sami mùszelë je ladowac piôskã i kłasc kòl gminny drodżi. To nic nie dôwało i mùszelë kòpac rów. Wòda narobiła szkód, a wedle mieszkańców w radzenim so z zalenim mielëbë pòmòc ògniarze. Ùrzãdnicë gôdają, że tëch pò prôwdze mògą sczerowac do Kaczk, jeżlë mieszkańcë nie bãdą sobie dôwelë radë. We czwiôrtk piątégò strëmiannika przëjachóny bëlë inspektorzë wòdnégò nadzéru. Òd jich òpinie zanôleżi, czë rëgnie proces mający sprawdzëc, czë teòriô ò pòdłączenim Gduńsczich Ògardów do prësczich drenażów je prôwdzëwô.