Pòjedincznémù przedstôwcë gatënkù òdjimczi zrobiło karno badérów w rezerwace rodë w grańcach Nadmòrsczégò Krôjmalënkòwégò Parkù.
W Rezerwace Rodë „Beka” nad Pùcką Hôwingą òb czas òbserwacjów ptôchów prowadzonëch przez sztërzech znajarzów w pòniedzôłk piątégò maja wieczór w karenkù trulôczów òstôł zmerkóny jeden kanadijsczi trulôcz (Antigone canadensis). Jegò gatënk nôtërno żëje w Nordowi Americe i nordowò-pòrénkòwi Azje. Ùzdrzenié gò na Kaszëbach je pierszim taczim przëtrôfkã w Pòlsce, a jednôstim abò dwanôstim pòcwierdzonym w òbéńdze Zôpadny Palearkticzi, jakô òbjimô Eùropã, Nordową Afrikã i part Azje. Òdkriwcë, to je Łukôsz Janocha, Samùel Sosnowsczi, Antón Karolôk i Mark Biegańsczi, zrobilë trulôczowi òdjimczi i pòchwôlëlë sã òdkrëcym w spòlëznowëch mediach. Kanadijsczi trulôcz nie je w swòji rodny zemi w zagrôżbie. Je mniészi òd zwëczajnégò trulôcza (Grus grus). Jidze gò pòznac pò we wikszoscë bladoszarëch piórach, z mòckò sã apartniącym czerwionym plachcã na łepie.
H.S.Sz.
Twoje zdanie jest ważne jednak nie może ranić innych osób lub grup.
Komentarze opinie