Zôczątkòwé sondażë zarô pò skùńczenim welowaniô wskazéwałë na dobëcé Rafała Trzaskòwsczégò, le pò pòdrechòwanim głosów ze wszëtczich kòmisjów wëchôdô na to, że wicy głosów dostôł jegò kòntrkandidat.
Wedle pòdôwków Państwòwi Welowny Kòmisje w drëdżi turze welacjów na prezydenta Pòlsczi dobéł przédnik Institutu Nôrodny Pamiãcë, Karól Nawrocczi ze Gduńska. Welowało na niegò piãcdzesąt i òsmëdzesąt dzewiãc setnëch procenta welëjących. Dostôł wnetka trzësta sétmëdzesąt tësący wicy głosów òd prezydenta Warszawë Rafała Trzaskòwsczégò, kandidata Òbëwatelsczi Kòalicje, jaczi wszedł z nim do drëdżi turë. Karól Nawrocczi béł parłãczony jakno kandidat Prawa i Sprawiedlëwòscë, chòc do partie nie nôleżôł i same ji wëszëznë nazéwałë gò kandidatã òbëwatelsczim. Òb kampaniã wkół niegò narosło wiele kòntrowersjów zrzeszonëch z jegò dôwnyma związkama ze strzodowiszczã pseùdokibiców, òbwinama ò sutenerstwò i szachlarstwa w wënajimanim mieszkaniów czë włożenié so do gãbë nikòtinowégò mieszka na debace na żëwò. Nimò to ùdało mù sã przekònac minimalną wikszosc welëjącëch, a wedle znajarzów kluczowé bëło tu przekònanié welmanów kandidatów z trzecym i czwiôrtim nôwëższim wënikã pierszi turë: Sławòmira Mentzena i Grégòra Braùna. Do drëdżégò lepińca Nôwëższi Sąd mùszi pòcwierdzëc wôżnosc welacjów. Wedle kòdeksu przësëga i òbjimniãcé ùrzãdu prezydenta przez Karóla Nawrocczégò nastąpi szóstégò zélnika.
H.S.Sz.
Twoje zdanie jest ważne jednak nie może ranić innych osób lub grup.
Komentarze opinie