Reklama

Kartel rozgòrzony pò smiercë wódcë

Klëka

24/02/2026 09:49

Ze swiata, Kartel rozgòrzony smiercë wódcë - zdjęcie, fotografia

Przédnik przesprôwczi òrganizacje zdżinął pò strzélindze z szandarama, jaczi przëszlë do niegò dodóm. Krótkò pòtemù Meksyk zapłonął.

W niedzelã dwadzestégò drëdżégò gromicznika meksykańsczé specjalné służbë naszłë doma w gardze Tapalpa w stanie Jalisco przesprôwcã Nemesio Osegùerã Cervantesa, znónégò lepi jakno El Mencho. Brutalny wódca Kartelu Nowégò Pòkòleniégò Jalisco béł jednym z nôbarżi pòszëkiwónëch przesprôwców w kraju. Òb czas wëmianë ògnia szandarzë zabilë jegò òchróniarzów, a jegò renilë. Ùmarł w kònwòju do stolëcë kraju. To rozgòrzëło lokalnëch wódców Kartelu Nowégò Pòkòleniégò, jaczi zaczãlë wałã przemòdżi w zôpadnym i pôłniowò-zôpadnym Meksykù, gdze je nôwikszô kòncentracjô jich partów. Blokòwelë drodżi zażôliwającë na jich westrzódkù aùtołë, pòdpôlëlë wiele banków i aptéków. Do mediów trafiła gôdka ò jich atakù na latawiszcze w Gùadalajarze, stolëcë stanu Jalisco. Zagrôżba na zaatakòwónëch terenach bëła na tëli wiôlgô, że wëszëznë zakôzałë mieszkańcóm w niedzelã i pòniedzôłk wëchadac z dodomù. Òdwòłelë téż zajmë w szkòłach. Wieczór prezydentka Claùdia Sheinbaùm przekôzała, że rozrëchë ju są skùńczoné, niżódna droga nie je zasztopónô, a przédny sprôwcë ataków òstelë zatrzimóny. Lecbë fligrów do zagrożonëch terenów bãdą znowioné nôpózni do kùńca wtórkù. Atakù na fligerplac wedle prezydentczi nie bëło. Minister bezpiekù Òmar García Harfùch pòcwierdzył, że służbë aresztowałë sétmëdzesąt lëdzy.

Źródło i opracowanie własne