Na Dzéń Jednotë Kaszëbów Ministerstwò Infrastrukturë przekôzało swòjã decyzjã co do przëjãcô pòzwë „Kaszëbskô Darga” dlô ekspresówczi S6.
We strzodã dzewiãtnôstégò strëmiannika, w Dzéń Jednotë Kaszëbów, Ministerstwò Infrastrukturë dało do wiadë, że wedle starë Kaszëbsczégò Parlamentarnégò Karna i jinszich dzejarzów ekspresowô droga S6 na dzélëkù w pòmòrsczim wòjewództwie dostónie pòzwã „Trasa Kaszubska – Kaszëbskô Darga”, a ùstawioné kòl ni bãdą dwajãzëkòwé tôfle, pò pòlskù i kaszëbskù, co mô pòdsztrichnąc apartnotã regionu. Decyzjô ministerstwa wiele lëdzy ùceszëła, tim barżi że stara ò wëapartnienié Kaszub dérowała ju trzë lata, a dotądka ministerstwò tłómaczëło, że dodanié pòzwów môlëznów pò kaszëbskù zwikszi lëczbã merków na tôflach, sprawi, co òne bãdą nié do przeczëtaniô, a przez to mdze miało złi cësk na bezpiek. Nowô decyzjô ministerstwa rozczarzëła równak tëch, co rechòwelë na nadanié kaszëbsczi pòzwë i kaszëbsczich pòzwów môlëznów na całi drodze S6, òd Szczecëna do Rusocëna. Na ten bédënk doch delë zgòdã jednomëslną ùchwałą pòsélcowie Sejmikù Zôpadnopòmòrsczégò Wòjewództwa. Wôrt równak zmerkac, że pòst na facebookù ministerstwa òstôł editowóny. Terô ju rëmniãté je wspòmnienié, że nowô pòzwa miała bë òbrzeszëwac blós dlô dzélëkù w pòmòrsczim wòjewództwie. Przetuszowónô bëła téż grafika, chtërna w òriginalnym pòsce przedstôwiała pòzwã „Kaszëbskô Darga” ùsadzoną kòl zamerkónégò na czerwiono bùdowónégò dzélëka drodżi w pòmòrsczim wòjewództwie, a w editowónym wiadle pòkazéwô nową pòzwã pò strzódkù całi ekspresówczi, tak ji pòmòrsczégò jak zôpadnopòmòrsczégò dzélëka. H.S.Sz.
Twoje zdanie jest ważne jednak nie może ranić innych osób lub grup.
Ten komentarz jest ukryty - kliknij żeby przeczytać.
Ten komentarz jest ukryty - kliknij żeby przeczytać.
Ten komentarz jest ukryty - kliknij żeby przeczytać.