Reklama

Kaszëbskô młodzeżô zebrónô w Gòrze

Klëka

19/10/2025 08:09

Z Kaszëb, Kaszëbskô młodzeżô zebrónô Gòrze - zdjęcie, fotografia

To ju sódmô edicjô zéńdzeniów mającëch integrowac młodëch z Kaszub pòmidzë òdbiwającyma sã co piãc lat kòngresama.

Midzëkòngresowi Zjôzd Młodëch Kaszëbów w sobòtã òsmënôstégò rujana gòscëła Gòra w gminie Wejrowò. Zaczãło sã òd złożeniô kwiatów pòd kamieniã na wdôr pò Tónie Ôbramie na placu przed kòscołã swiãtégò Mateùsza Apòsztoła. Tam téż pòzeszłi òdspiéwelë „Kaszëbsczi marsz” a téż „Zemiã rodną”, a pò krótczim przëwitanim przeszlë pòspólno do bùdinkù Spòdleczny Szkòłë miona Jakùba Wejhera, gdze béł przédny part zéńdzeniô.
Pò òdspiéwanim „Himnu Młodëch”, òd lat towarzącémù kòngresowò-zjazdowi rësznoce, gòscy pòwitelë òrganizatorzë, to je przedstôwcë partów Kaszëbskò-Pòmòrsczégò Zrzeszeniô z Gòrë i Banina, a téż przédniczka młodzëznowégò karna Cassubia Marta Òkrój-Dudzyńskô, jakô prowadzëła zetkanié. Òbezdrzec szło wëstãpé mùzyczné a recytatorsczé, midzë jinszima dzecnëch karnów Cantus Corda, Skôrb Złoti Górë, Môłé Serakòjce, PortArt i Spiéwné Kwiôtczi, téż Francëszka i Zofie Wandtków czë Kòrnelie Garstczi. Swòje dzejania przedstawilë przedstôwcë karnów Cassubia i Pomorania. Aùtorzë rapòrtu Etnotankù pòd titlã „Inicjatiwë młodëch Kaszëbów” wstãpno przedstawilë wniósczi z niegò a téż przërôczëlë na fùlną prezentacjã, jakô bãdze w czwiôrtk dwadzestégò trzecégò rujana na Gduńsczim Ùniwersytece. Na kùńc rozdóné bëłë nôdgrodë za zaangażowanié w rësznotã młodëch. "Mòtilk w Jantarze" trafił do Spiéwnëch Kwiôtków, a trzë Sztaturczi profesora Gerata Labùdë do Kòrnelie Garstczi, Móniczi Kapiszczi ë Karna Sztudérów Pòmòraniô.

H.S.Sz.