Reklama

Kòfer z całã òfiarë szmërgnãlë do strëdżi w Ùstce

Klëka

31/10/2025 10:52

Rozrzeszonô òstała sprawa nalézeniô latos w maju cała wcësłégò do rézowégò kòfra. Doszło do mòrdarstwa, a w sprawie doszło do zatrzimaniów w Ùstce i Miechùcënie.

Szandarzë z Kriminalnégò Wëdzélu Wòjewódzczi Kòmendë Pòlicje we Gduńskù i Miesczi Kòmendë Pòlicje we Słëpskù delë do wiadã, że nalazłë sprôwców zbrodnie òdkrëti latos w maju w Ùstce. Tam kòl szasëje Rëbacczi przëtrôfkòwi przechôdélcë zmerkelë w przepłiwający strëdze rézowi kòfer, z jaczégò niosła sã lëchô pôcha. Bënë bëło fest ju trëpiejącé cało chłopa, nierozrąbóné, wcësłé do kòfra w całoscë. Pòwiadomioné służbë zabrałë cało na badérowania. Sekcjô pòcwierdzëła, że béł to chłop zadżiniony łoni w gòdnikù. Dzãka analize nagraniów i zeznaniów swiôdków ùdało sã duńc do tegò, że chłop òstôł zamòrdowóny w jednym z mieszkaniów w Ùstce, a pòtemù wcësłi do kòfra dlô ùkrëcô zbrodnie. Je wiedzec, że mòrdarze drãgò gò pòbilë bijącë gò pò głowie, ale pòlicjô nie pòdała, co jich parłãczëło i jaczi béł mòtiw. W sëmie w sprawie òbwinë padłë na sztërë òsobë. Dwie szandarzë zatrzimelë w Ùstce i w Miechùcënie – to trzëdzescelatny chłop i dwadzescesétmëlatnô białka, jaczi ùczëlë òbwinë mòrdarstwa i lëchégò òbéńscô sã z całã òfiarë. Jesz jeden chłop winowóny ò mòrdarstwò i lëché òbéńscé sã z całã, sztërdzesësztërëlatk, òstôł doprowadzony z pòdszukòwnégò aresztu. Szlachòwno z aresztu wzãlë drëdżégò trzëdzescelatka, jaczi w samim mòrdarstwie miôł nie brac ùdzélu, a blós w szmërgniãcym kòfra do rzéczczi.

H.S.Sz.