Reklama

Kùńc diplomaticznégò przedstôwctwa Rusczi we Gduńskù

Klëka

21/11/2025 11:00

Dôwny kònsulat Rusczi we Gduńskù. Aùtór: Lisarlena; zdrzódło: https://pl.wikipedia.org/wiki/Konsulat_Generalny_Rosji_w_Gda%C5%84sku#/media/Plik:Gdansk_Batorego15.jpg

Przed Gòdama Ruscë mają wëcygnąc z bùdinkù we Wrzeszczu przë szasëje Batorégò. Przez lata brëkòwelë kònsulatu nie płacącë dëtków Skarbòwi Państwa.

We strzodã dzewiãtnôstégò smùtana Minister Bùtnowëch Sprôw Radosłôw Sykòrsczi dôł do wiadë, że Generalny Kònsulat Rusczi Federacje we Gduńskù przë szasëje Batorégò mô òstac zamkłi. To je slédny jesz dzejający rusczi kònsulat w Pòlsce. Do dwanôsti w nocë dwadzestégò trzecégò gòdnika jegò robòtnicë mają z niegò wëcygnąc i nalezc sã bùten pòlsczich grańców. Ten ògłos béł dóny pò tim, jak na zlecenié Rusków dwaji òbëwatele Ùkrajinë dokònelë diwersje na sztrece z Warszawë do Lublina, le copniãcé zgòdë na dzejanié kònsulatu bëło zapòwiôdóné ju rëchli. Jegò òbsada nie òdpòwiôdała na wezwania do zapłatów za ùżiwanié bùdinkù, a mielë narechòwóné ju piãc i pół milióna złotëch òd dwa tësące trzënôstégò do dwa tësące dwadzestégò trzecégò rokù, a jesz trzë miliónë òdsetków. Prawie òd dwa tësące dwadzestégò trzecégò za wskôzą ministerstwa Gduńsk zaczął rechòwac òpłatë, bò przódë status bùdinkù nie béł gwësny – fòrmalno pò ùsadzenim samòrządów przeszedł na Skôrb Państwa, ale Ruscë mielë gò za swój. Zajimóny béł òd tësąc dzewiãcset piãcdzesãtégò pierszégò rokù na spòdlim ùgôdënkù Pòlsczi z Sowiecką Zrzeszą ò brëkòwaniu bùdinkù za darmôka przez sowiecczi kònsulat. Miała to bëc òdpłata za znikwiony òb wòjnã pałac kòl Dłudżich Ògardów, jaczi Ruscë zajimelë ju òd tësąc sétmëset dzewiãtnôstégò rokù.

H.S.Sz.