Jegò gabinetë przedërchałë prezydenturã Donalda Trumpa w USA i pòszëdło kòrónawirusa. Niezadowòlnienié spòlëznë a téż jegò gwôsny partie nie pòzwòli mù równak przedërchac pòstãpnégò rokù na stanowiszczu.
W pòniedzôłk 6. stëcznika premiéra Kanadë Justin Trudeau ògłosył swòjã rezygnacjã z ùrzãdu. Robiący na tim stanowiszczu òd 2015 rokù pòlitik mô téż òprzestac czerowac Liberalną Partią, jakô wëbierze nowégò przédnika na môl Trudeau, chtëren do tegò czasu dali mdze trzimôł swòje òbrzészczi. Na jegò wniósk generalnô gùbernatórka Mary Simon mô zawiesëc robòtã parlamentu do 24. strëmiannika. Na jeseni mieszkańcë Kanadë wezną ùdzél w nowi parlamentarny welacje, w jaczi òkôże sã, czë nowi lider Liberałów dô radã wrócëc dobré miono swòji partie. Ùstąpienié premiérë pò 9 latach rządów wedle mediów bëło wëmùszoné przez cësk bënë Liberalny Partie, chtërna tracy w sondażach, tak jak zmniésziwô sã pòpùlarnosc ji lidera. Górz Kanadijczików na szefa rządu rosce òd dwùch lat, a przëczënama są wësoczé prizë jestkù i mieszkaniów, òbwinë ò pòdpłacënczi, a téż sëłowé òdpòwiescë procëm mirnym demònstracjóm.
H.S.Sz.
Twoje zdanie jest ważne jednak nie może ranić innych osób lub grup.
Komentarze opinie