Slédnô britijskô wãglowô elektrowniô skùńczëła robòtã. Rząd chce przeńc na barżi ekòlogiczné spòsobë produkcje sztrómù.
W pòniedzôłk 30. séwnika robòtã kùńczi slédnô wãglowô elektrowniô we Wiôldżi Britanie we wsë Ratcliffe-on-Sour w anielsczim grôfstwie Nottinghamshire. Zakłôd òstôł òficjalno zamkłi pò 57 latach fùnsknérowaniô. Tim samim Zjednóné Królestwò stało sã pierszim państwã z karna G7, jaczé skùńczëło z brëkòwanim wãglowi energie do produkcje sztrómù. Latos w łżëkwiace kraje G7 zgòdzëłë sã na wëcopanié z wãglowi energeticzi w pierszi pòłowie nôblëższi dekadë. Tak tej zamikô sã historiô wnetka półtora stalata wëzwëskiwaniô wãglowi energie we Wiôldżi Britanie.
Na taczi ôrt britijszczi rząd zjiscył swòjã zapòwiesc z 2015 ò zamkniãcym wszëtczich wãglowëch elektrowniów òb 10 lat, mającë na célu ògrańczenié zaszkòdów dlô klimatu. W dalszich planach je cawnô dekarbònizacjô energeticzi do 2030 i sygniãcé zerowi emisje cepłownëch gazów do 2050. „Mòże cząd wãgla sã kùńczi, ale nowi cząd môlów robòtë przë dobri energie dlô najégò kraju prawie sã zaczinô” – gôdô britijsczi minyster energeticzi, Michael Shanks.
HSz
Twoje zdanie jest ważne jednak nie może ranić innych osób lub grup.
Komentarze opinie