Reklama

Kùńc z bezprawnym rozwôlanim bùdinków mùzelmanów w Indiach

Klëka

15/11/2024 11:19

Òfiarama prakticzi stanowëch wëszëznów bëłë familie lëdzy òbwinionëch ò przesprawë.

We strzodã 13. smùtana w òdpòwiescë na trójné peticje i protestë indijsczi Nôwëższi Sąd wëdôł rozsądzenié w sprawie prakticzi „bùldożerowi sprawiedlëwòscë”. Chòdzy ò przëtrôfczi rozwôlaniô bùldożerama – na pòlét stanowëch włôdzów – dodomów lëdzy, jaczi òstelë òbskôrżony ò wszelejaczé przesprawë, colemało jesz przed rozrzeszenim sprawë przez sądë. Protestëjący procëm temù zjawiszczu delë bôczënk na to, że taczé decyzje wëdôwają nôczãscy administracje stanów, w jaczich rządzy prohindujisticznô Indijskô Lëdowô Partiô, a mieszkańcama rozwaliwónëch chëczów są przedstôwcë mùzelmańsczi mniészëznë.

W wërokù Nôwëższégò Sądu praktika òstała òstro pòtãpionô. Dokùment dôwô bôczenié na felënk logiczi i zgódnoscë z prawã w ùdokaznieniach wëdôwónëch przez samòrządë decyzjów, a téż scwierdzywô, że taczé dzejania nie słëchają demòkraticznémù państwù. Òd terô miéwcë dodomów mùszą dostawac wiadło razã z ùdokaznienim na piãtnôsce dni przed namienioną przez wëszëznë rozbiérką, żebë mòglë w tim czasu òdwòłac sã òd decyzje. Nawetka żelë tegò nie zrobią, całô rozbiérka mùszi bëc ùdokùmentowónô na nagraniach.

Reklama

H.S.Sz.

Czytaj nas w Google

Dodaj do Google

Źródło i opracowanie własne