Gminë i kréze bãdą przëjimac zgłoszenia wsów i zôgrodów do kònkùrsu „Piãknô Pòmòrskô Wies”. Do dobëcô są dëtkòwé nôdgrodë.
Rëgnãła latosô edicjô kònkùrsu „Piãknô Pòmòrskô Wies”. Na etapach gminnëch, krézowëch i wòjewódzczich bãdą wëbiéróné nôpiãkniészé wse i zôgrodë w pòmòrsczim wòjewództwie. Do trzëdzestégò czerwińca mùszą napłënąc zgłoszenia do wòjewódzczégò etapù, pò jedny wsë i jedny zôgrodze z kòżdégò krézu – te kréze i gminë wëbierzą przódë w gwôsnëch terminach, dlôte wôrt szëkac za infòrmacjama ò kònkùrsu na internetowëch starnach swòjich gminów. Òbtaksowiwóné bãdze nié blós wizualné piãkno môlëznów i gbùrstwów, ale téż spòleznowé pòstawë, inicjatiwë, trzimanié tradicje czë drëszbë ze strzodowiszczã. Nôpiãkniészô wies dostónie trzëdzescë tësãcy złotëch, a miéwca nôpiãkniészi zôgrodë piãc tësący. Przewidzóné są téż nôdgrodë za place na pòdium i za wëapartnienia. Na jeseni bãdze rozrzeszenié kònkùrsu i przëznanié nôdgrodów. Łoni za nôpiãkniészą wies w wòjewództwie ùznelë Roczitë w gminie Czôrnô Dąbrówka, a za nôpiãkniészą zôgrodã Jolantë Koler z Solnicë w gminie Nowi Dwór. Drobnotë co do zgłoszeniów są do nalézeniô na starnach gminów a téż samòrządu pòmòrsczégò wòjewództwa.
H.S.Sz.
Twoje zdanie jest ważne jednak nie może ranić innych osób lub grup.
Komentarze opinie