Projektancë mògą dokazac swòjich spòsobnosców w projektowanim sztaturczi abò jiny fòrmë fizycznégò ùczestnieniô pòmòrsczich dzejarzów kùlturë i kùńsztu.
Òb czas przińdnorocznégò Dnia Dzejającëch w Kùlturze, 29 maja 2025 pierszi rôz mô òstac przëznónô nowô nôdgroda dlô aktiwnëch dzejarzów kùlturë i kùńsztu, pòzwónô Nôdgrodą Tédorë – z narzeszenim do Tédorë Gùlgòwsczi, znóny jakno wespółzałóżczka mùzeùm na wòlnym lëfce we Wdzydzach, a téż ùsôdzczka kaszëbsczégò wësziwkù. Z ti leżnoscë Nadbôłtëcczé Centrum Kùlturë ògłosëło kònkùrs na projekt fizycznégò nosnika nôdgrodë.
Òrganizatór kònkùrsu dopùszcziwô wiôlgą pòjugã w twòrzenim – fòrma nôdgrodë mòże bëc zanôleżnô òd ùdbë projektanta, a jedurnym ògrańczenim je technika wëkònaniô, chtërna dô mòżlëwòtã produkcje pòwtôrzalnëch egzemplarzów, a téż kòszt wëkònaniô jedny sztaturczi nie wëchôdający nad 1500 zł. Ùczãstnicë ni mùszą sami wëkònëwac nôdgrodë – NCK przëjimô graficzné projektë razã z òpisënkã i wërechòwanim prizu produkcje. Na dobiwcã kònkùrsu żdaje dëtkòwô nôdgroda, 8000 zł.
Żebë wzyc ùdzél w kònkùrsu, nót je wëfùlowac fòrmùlôrz online i przesłac projekt do 29. smùtana do gòdz. pół czwiôrti pò pôłnim (15.30). Regùlamin i dodôwkòwé infòrmacje mòże przeczëtac na starnie Nadbôłtëcczégò Centrum Kùlturë.
H.S.Sz.
Pòwrózk: https://nck.org.pl/pl/wydarzenie/6474/open-call-czyli-szukamy-najlepszego-projektu-statuetki-nagrody-teodory
Twoje zdanie jest ważne jednak nie może ranić innych osób lub grup.
Komentarze opinie