Reklama

Kredlë banknotë z rozbitégò fligra

Klëka

03/03/2026 09:58

Latawiszcze El Alto. Òdj. P. Drozd; zdrzódło: https://pl.wikipedia.org/wiki/Port_lotniczy_El_Alto#/media/Plik:El_Allto_airport.jpg

W Bòliwie nie dolecôł na latawiszcze fliger z ladënkã nowò wëdrëkòwónëch banknotów. Spôdł na aùtołë na szasym.

Czilenôsce lëdzy z bòliwijsczégò gardu El Alto ùczëło òbwinë ò wandalizm w związkù z tragicznym zdarzenim z piątkù dwadzestégò sódmégò gromicznika. Lecący nad gardã fliger szëkòwôł sã do lądowaniô na tuwòtnym latawiszczu. Czej narôz zaczã sã bùrzô z mòcnym gradã, pilocë stracëlë czerownosc i rozbilë sã fligrã ò zemiã, spôdającë na czile aùtołów na szasym. Zdżinãłë dwadzesce dwie òsobë, w tim załoga fligra i niechtërny z lëdzy jadącëch aùtołama. Wedle zeznaniów swiôdków i przistãpnëch rejestrów lecbë, pilocë zrobilë wszëtkò, żebë ùniknąc wleceniô w stojącé krótkò mieszkalné bùdinczi. Pò ùderzenim na placu jesz przed służbama pòjawilë sã mieszkańcë, jaczi zmerkelë, że we fligrze halelë banknotë, jaczé wësëpałë sã na szasé ë wiele zdôwało sã bëc niezniszczonëch. Lëdze naczãlë zbierac tëli dëtków, kùli delë radã ùniesc, a tej próbòwelë zwiornąc, niglë przëjadą szandarzë. Doszło do biôtków midzë kradélcama a szandarama a téż agresje wedle gazétników, chtërny pòkazéwelë, co sã dzejô. Czilenôsce òsób bëło zatrzimónëch. Òdpòwiedzą leno za wandalizm, bò same banknotë ni miałë wôrtnoscë – nie bëłë jim pònadôwóné numrë serie. Ùdostóné nazôd dëtczi òstóną kòmisjowò zniszczoné. Sóm wëpôdk fligra òstónie jesz zbadérowóny przez prokùraturã.

H.S.Sz.

Czytaj nas w Google

Dodaj do Google

Źródło i opracowanie własne