Reklama

Ùkôrelë winnëch znikwieniô bòżimãczi

Klëka

23/04/2026 12:39

Izaraelsczi żôłnérz. Pòzdrzatkòwi òdjimk. Òdj. Dor Posner; zdrzódło: https://pl.wikipedia.org/wiki/Si%C5%82y_Obronne_Izraela#/media/Plik:Israelifighter.JPG

Żôłnérz, jaczi brëkòwôł pasékra, i jegò drëch òstelë òdsëniony òd służbë. Jinszi bëtny przë zdarzenim zeznôwelë w sprawie.

Òd czedë Izrael na zôczątkù strëmiannika znowił biôtkã z Hezbòllahã w związku z jegò wspiarcym dlô Iranu, izraelsczé wòjskò zajãło pôłniowi Liban. W niedzelã dzewiãtnôstégò łżëkwiata wëcekł òdjimk, na jaczim je widzec izraelsczégò żôłnérza rozbijającégò pasékrã figùra Jezësa zdjimniãtą z krziża. Bòżômãka stojała kòl priwatny chëczë we wsë Debel zamieszkóny przez chrzescëjón-maronitów. Probòszcz tameczny parafie ksądz Fadi Flajfel gôdôł, że taczé rzeczë zdôrzałë sã ju wczasni. Do izraelsczégò wòjska trafiło skòpicą skargów ze swiata, w tim ze Zjednónëch Stanów. Taczé zachòwanié pòtãpił téż premiéra Benjamin Netanjahu. We wtórk dwadzestégò pierszégò łżëkwiata Sëłë Òbarnë Izraela dałë do wiadë, że nalazłë lëdzy, co bëlë przë zdarzenim. Żôłnérz z pasékrã i drëdżi, jaczi nagriwôł znikwienié bòżimãczi, òstelë òdsëniony òd służbë i skôzóny na trzëdzescë dni aresztu. Szesc jinëch żôłnérzów, jaczi nie strzimelë drëchów przed przesprawą, bëlë wezwóny do wëwidnieniów. Nôzwëska nëch ùkôrónëch nie bëłë pòdóné. W òficjalnym kòmùnikace wòjskò pòdczorchnãło, że zachòwanié żôłnérzów wedle wëdowiédzë bëło czësto w przék wôrtnoscóm i rozkazóm Sył Òbarnë Izraela.

H.S.Sz.

Załączniki