Krëjamné zgònë, chòroscë i hantawirus

Rézowi òkrãt przez trze tidzenie stracył sztërzech pasażérów. Dwùch nôleżników òbsadë je cãżkò chòrëch.

Na òkrãce MV Hondius, co jachôł z Argentinë na Kanarijsczé Òstrowë, òd zôczątkù rejsu kòl trzë tidzenie nazôd doszło do czile zgònów i groznëch zakôżeniów. Jednôstégò łżëkwiata jeden starszi Holender zle sã pòczuł i ùmarł z nieznóny przëczënë. Dwadzestégò czwiôrtégò łżëkwiata òkrãt dobił do Òstrowù Swiãti Helenë, gdze cało ùmarłégò bëło zabróné na krôj. Białka tegò chłopa ùmarła krótkò pòtemù. Dwadzestégò sódmégò łżëkwiata jednégò cãżkò chòrégò Britijczika ewakùòwelë do Repùbliczi Pôłniowi Africzi. Lékarzą gò w priwatny klinice, je w cãżczi ale sztabilny stojiznie. Mô hantawirusa – ôrt wirusa przenôszóny przede wszëtczim przez szërë, rzôdkò téż przez lëdzy, atakùjący płëca i nerczi. Ni ma lékarstwa ani sprôwdzony terapie jinszi jak symptomòwô na chòroscë sprôwióné przez hantawirusë. W sobòtã drëdżégò maja na pòkładze òkrãtu ùmarł Niemc, przëczëna téż nie je znónô. Terô jednostka stoji kòl Òstrowów Zelonégò Cëpla ze sto sztërdzescë dzewiãc lëdzama na pòkładze. Dwùch nôleżników òbsadë òkrãtu mô symptomë płëcny chòroscë, szlachòwną za tą sprôwióną przez hantawirusë, ale jesz bez pòcwierdzeniô. Wëszëznë na Zelonym Cëplu nie dałë lëdzóm zlezc na krôj, ale wësłałë lëdzy do sprôwdzeniô sytuacje na pòkładze. Je ùdba na òdpłëniãcé na Tenerifã abò Las Palmas, bò tam służba zdrowiégò bãdze w sztãdze pòmòc chòrim, a lëdzy bãdze szło wëpùscëc. Je téż gôdka ò ewakùacje chòrëch przez fliger, jaczi zabierze jich prosto do Eùropë. Ùstôw pasażérów ùsadzonëch na òkrãce òstôwô nimò wszëtkò dobri. Òbsada przëbôczô jim, że ze wszëtczich zdarzeniów leno jedna òsoba mô pòcwierdzonégò haplowirusa, tã lékarzą w Pôłniowi Africe, na òkrãce ni ma niżódnëch szërów, a przenôszanié wirusa midzë lëdzama je rzôdczé.

H.S.Sz.