Reklama
Krëjamnota smiercë szpańsczégò infanta rozrzeszonô
08/11/2025 09:09
Media docygałë rozmajité wersje tegò, jak zdżinął Alfónks òd Bùrbònów, jinszé jak to, co pòdôwałë òficjalné zdrzódła. Prôwdã òdtacył ùszłi król Szpańsczi, jegò brat, jaczi béł tedë na placu.
Ùszłi król Szpańsczi Jón Karól I òd Bùrbònów wëdôł we Francje ksążkã ze wspòminkama pòd titlã: „Juan Carlos I d’Espagne: Réconciliation”. Ji szpańskô premiéra je pòmëslónô na gòdnik, ale ji zamkłosc ju sã stała w Szpańsce szerok znónô dzãka temù, że rozrzeszonô òstała w ni krëjamnota smiercë jegò młodszégò brata Alfónksa. Doszło do ni we Wiôldżi Czwiôrtk w tësąc dzewiãcset piãcdzesątim szóstim rokù. Tedë òficjalné zdrzódła pòdałë, że piãtnôscelatny infant zdżinął òb czas czëszczeniô rewòlwérë swòjégò òjca, chtërna narôz wëstrzélëła. W nônowszi ksążce Jón Karól, jaczi tedë béł òsmënôsce lat stôri, napisôł, że tedë to òn trzimôł pistól. Òbëdwaji z bratã nim sã bawilë i bëlë gwës, że nie wëstrzéli, bò przódë wëjãlë magazynk. Nie wiedzelë, że w lufie òstała jedna kùgla. Ta wëpôlëła w lëft, òdbiła sã òd czegòs i trafiła Alfónksa w łësënã – ùmarł w remionach swòjégò òjca. Przińdnégò króla Szpańsczi òjc pò tim wësłôł do òstri wòjskòwi szkòłë, a jich relacje baro sã pògòrszëłë. Jón Karól cwierdzy, że jakbë jegò bracyna tedë nie zdżinął, jegò żëcé nie bëłobë tak smãtné i nieszczestlëwé. Przez całi czas jegò rodzëzna ùkriwała prôwdã, a bëło wiedzec leno tëli, że miôł òn bëc przë wëpôdkù swòjégò brata, co dôwało medióm spòdlé do domiszlaniô sã rozmajitëch turów ti historie.
H.S.Sz.
Reklama
Podziel się swoją opinią
Twoje zdanie jest ważne jednak nie może ranić innych osób lub grup.
Reklama
Wideo
Reklama
Komentarze opinie