Czile gòdzyn warało zaòstrzenié prawa wprowadzoné przez prezydenta, òficjalno dlô przëwróceniô sztabilnotë w kraju i zmniésziwanié cësków òd nordowégò sąsada.
We wtórk 3. gòdnika òb wieczór môlowégò czasu w niezapòwiedzóny telewizjowi mòwie prezydent Pôłniowi Kòreji Jun Suk Jeol ògłosył wprowadzenié w kraju wòjnowégò ùstawù dlô eliminacje procëmpaństwòwëch sëłów zdrëszonëch z rządã Nordowi Kòreje. Ò to prezydent z Partie Lëdowëch Wëszëznów òbwinił òpòzycjã, jakô wëzwëskiwającë wikszosc w parlamence w tim tidzeniu òdrzucëła rządowi projekt bùdżetu i złożëła wniósczi ò sprôwdzenié rówiznë skòrumpòwaniô ù czile prokùratorów. Dzejanié parlamentu i mediów miało òstac ògrańczoné na mòcë tegò prawa, co bëło widzec pò kòrdonach szandarów przed bùdinkã parlamentu.
W nocë ze wtórkù na strzodã pôłniowòkòrejańsczé Nôrodné Zgromadzenié zrobiło głosowanié nad zniesenim wòjnowégò ùstawù, na co zgòdzëlë sã wszëtcë pòsélcowie na zalë: 190 na 300 nôleżników zgromadzeniô. Zgódno z kònstitucją kraju, Jun Suk Jeol béł przëmùszony òdwòłac swòjã wczasniészą decyzjã, na co zgòdã w kùńcu dôł téż rząd. Z bùdinkù parlamentu wòjska òstałë wëcopóné, a wkół prezydenta robi sã trzôsk – pò ògłoszenim decyzje parlamentu bëła ùrządzonô demònstracjô ò dimisjã pòlitika.
H.S.Sz.
Twoje zdanie jest ważne jednak nie może ranić innych osób lub grup.
Komentarze opinie