Reklama
Krziż w szkòle w Czelnie nie béł òbiektã tczë
13/01/2026 21:30
Z tegò, co gôdô szkólnô ë ji bronisz, wëzdrzi, że ò profanacje krziża w szkòle w Czelnie ni mòże bëc mòwë, a sprawã instrumentalno wëzwëskelë pòliticë.
W głosny sprawie wërzuceniô do kòsza krziża w spòdlowi szkòle w Czelnie je wiedzec ò nowëch faktach. W wëdowiédzach z mediama szkólnô òd anielsczégò winowónô ò òbrazã religiowëch wseczëców przedstawiła swòjã wersjã zdarzeniów. Szkòłownicë nôgwësni chcelë sobie zaszpòrtowac i w klase, w jaczi niżóden krziż przódë nie wisôł, pòwieselë plastikòwą zawiészkã w sztôłce krziża. Béł to element tónégò przezebleczeniô zôkònnicë na halloween, nigdë niepòmëslóny jakno òbiekt religiowi tczë. Zawiesëlë gò nad klôtką dlô klasowégò skrzéczka, co szkólnô ùznała za nieszmaczné ë wërzucëła zawiészkã do kòsza. Gôdała téż, że procëm temù, co rozeszło sã w mediach, do ùczniów nie òzwała sã nijak wùlgarno. Pòdała téż, że szkòłownika, jaczi miôł dac swòjim starszim do wiadë ò tak pòzwóny profanacje, òna nigdë nie ùczëła i òn nie béł przë całim zdarzenim. Pòlicjô pòcwierdzëla, że krziż béł òd haloweenowëch ruchnów. Bronisz szkólny Jack Pòtulsczi gôdô, że kòntekst taczégò ruchna miôłbë w ùdbie prawie wëszczerzac sã z dëchòwnëch òsób, tej ò òbraze religiowëch wseczëców ze starnë jegò klijentczi ni mòże bëc gôdczi. Pòdsztrëchnął téż, że nawet jeżlëbë tak bëło, zamkłô ùczbòwô klasa nie je pùblicznym placã, a leno tedë szłobë ji pòstawic jaczés òbwinë. Szkólnô ë ji bronisz są dbë, że ze sztrôfny sprawë ùdô sã prosto wëbarnic. Winowónô mësli téż ò cywilnym procesu w sprawie narëszeniô ji dobrégò miona midzë jinszima ze starnë pùblicznëch òsób, jaczé przekazéwałë dali ji pòdôwczi ë winowałë ò atak na religiã.
H.S.Sz.
Reklama
Komentarze opinie
Podziel się swoją opinią
Twoje zdanie jest ważne jednak nie może ranić innych osób lub grup.
Reklama
Wideo
Reklama
Komentarze