Reklama

Kòwidowé sedlëszcze w Mechelingach wcyg stoji

Klëka

01/04/2026 20:22

Bùdownik nie ùląkł sã nôkazów rozbiórczi. Mògą mù rozebrac chëczë za niegò.

Krézowi Inspektorat Bùdowlanégò Dozéru w Pùckù dôł do wiadë ò swòjich ùdbach na rozrzeszenié jiwru „kòwidowëch chëczi” w Mechelingach. Chòdzy ò dzesãc môłëch dodómków kòl mechelińsczégò pieglëszcza, jaczé pòstawiła firma z Bólszewa w dwa tësące dwadzestim rokù. Stoją w òbéńdze òsoblëwi zagrożony zalenim, w conie kònserwatorsczi òchronë, zarô kòl grańców rezerwatu Mechelińsczé Łączi ë Nadmòrsczégò Krôjmalënkòwégò Parkù. Pòstawilë je bez pòzwòleniów na bùdacjã ë jinëch brëkòwnëch administracjowëch zgòdów. Wedle dewelopérë òne miałë robic za òstrzódk dlô wëzdrowiałëch pò kòronawirusu, tak tej pòdlégałë pòd specjalné regle. Na wniósk tamtoczasnégò wójta gminë Kòsôkòwò Môrcëna Majka sprawie przëzdrzała sã Rejonowô Prokùratura w Pùckù. Ta doszła do tegò, że bùdownik chcôł w tim placu cos stawiac jesz niglë przëszło pòszëdło, ale tedë nie dostôł zgòdë. Bùdacjô nimò nakazów strzimaniô òd Bùdowlanégò Dozéru dali cygnãła. W dwa tësące dwadzestim drëdżim reklamòwelë ju jã w Internece jakno òstrzódk dlô òzdrowiałëch. Rok nazôd sąd kôzôł rozebrac sedlëszcze na kòszt inwestora, le òn tegò do dzys nie zrobił. Bùdowlany Dozér bãdze żorgôł ò ùżëcé przez Przédny Administracjowi Sąd pòstãpnëch métlów przëmùsu. Chòdzy ò nakôz rozbiórczi pòd grozbą dëtkòwi sztrôfë. Jeżlë i to nie pòmòże, mògą kazac rozebrac chëcze jinszi firmie, a kòsztama òbdrãżëc bùdownika.

H.S.Sz.

Źródło i opracowanie własne